БЎШ ИШ ЎРИНЛАРИ МЕҲНАТ ЯРМАРКАСИ ЎТКАЗИЛДИ
Қорақалпоғистон Республикаси Камбағалликни қисқартириш ва бандлик вазирининг 2023 йил 29 августдаги махсус хатига асосан ҳар бир туманларда йирик хусусий корхона ва ташкилотларда кўчма бўш иш ўринлари ярмаркаларини ўтказиш, аҳолини бўш иш ўринлари билан таништириб, доимий ишга жойлашишларига кўмаклашиш топширилган эди. Шунга асосан Амударё тумани Камбағалликни қисқартириш ва бандликка кўмаклашиш бўлими томонидан масъулияти чекланган жамият шаклидаги “Amudaryotex” хорижий корхонасида ва “Tamara textil” масъулияти чекланган жамиятида бўш иш ўринлари ярмаркаси ўтказилди.
Тадбирда “Amudaryotex” хорижий корхонаси, “Tamara-textil” масъулияти чекланган жамияти масъуллари, туман Ички ишлар бўлими, Ёшлар ишлари агентлиги туман бўлими вакиллари ва иш билан банд бўлмаган ҳамда фаол иш қидираётган фуқаролар иштирок этдилар.
Меҳнат ярмаркасини туман Камбағалликни қисқартириш ва бандликка кўмаклашиш бўлими бошлиғи ўринбосари Баҳодир Балтабаев очди ва олиб борди. Ярмарка 2 жойда, аввал “Amudaryotex” хорижий корхонасида, кейин “Tamara textil” МЧЖда алоҳида-алоҳида ўтказилиб, иш изловчилар бевосита корхоналардаги иш жараёнлари ва яратилган шароитлар билан таништирилди.
Меҳнат ярмаркасида 52та корхона ва ташкилотлар 265та бўш иш ўринлари билан иштирок этдилар. Унга туман ҳудудида яшовчи иш изловчи фуқаролар, пробация ҳисобида турувчилар, “Аёллар дафтари” ва “Ёшлар дафтари”да турувчи фуқаролар таклиф қилинди. Бундан ташқари, тадбиркорлар, ҳунармандлар, тижорат банклари, касб-ҳунарга тайёрлаш, қайта тайёрлаш ва малакасини ошириш бўйича ўқув масканлари ўқитувчилари қатнашдилар.
Ярмарка давомида туман Камбағалликни қисқартириш ва бандликка кўмаклашиш бўлими томонидан Тўлқин овулида ташкил қилинган Тикувчилик ўқув-курсининг 10 нафар битирувчи қизларига ўқишни муваффақиятли тамомлаганликлари тўғрисидаги сертификатлар топширилди.
Меҳнат ярмаркасида 94 нафар ишга жойлашиш истагидаги фуқароларнинг 31 нафарига йўлланма берилиб, ишга жойлаштирилди, касбга ўқитиш, қайта ўқитиш курсларига 12 нафар фуқаро юборилди, ҳақ тўланадиган жамоат ишларига 18 нафари жалб қилинди. 33 нафар фуқарога эса меҳнат қонунчилигига оид масалалар, касб-ҳунарга тайёрлаш, қайта тайёрлаш ва малакасини ошириш бўйича, чет давлатларда меҳнат фаолиятини расмий равишда амалга ошириш, тижорат банкларидан кредит олиш тартиблари ва бошқа масалалар бўйича маслаҳатлар берилди.
Шу жиҳатдан олиб қарайдиган бўлсак, туманимиздаги иш билан банд бўлмаган фуқароларнинг, айниқса, хотин-қизлар ва ёшларнинг бандлигига кўмаклашиш, уларни тумандаги бўш иш ўринларига йўналтиришга хизмат қилган тадбирни жуда аҳамиятли бўлди, дейиш мумкин.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
