УСТОЗ ВА МУРАББИЙЛАР УЧУН БАЙРАМ ТАДБИРИ ЎТКАЗИЛДИ

Келажагимиз эгалари бўлмиш ёш авлодни билимли, саводли, маънавий баркамол ва жисмонан соғлом қилиб вояга етказишда ўқитувчи-мураббийларнинг ҳиссаси бениҳоя каттадир. Улар бераётган пухта билим ва ибратли тарбия катта ҳаёт остонасида турган ўғил-қизларнинг ватанпарвар, халқимизга фидойи ва ҳалол хизмат қиладиган инсонлар бўлиб етишишига замин бўлиб хизмат қилади.

Юртимизда 1 октябрь Ўқитувчи ва мураббийлар куни деб белгиланиб, умумхалқ байрами сифатида нишонланиши устозларга юксак эътибор ва ҳурматнинг яққол намунасидир. Амударё туманида ҳам ҳар йили ушбу сана кенг тантана қилинади, таълим фидойилари, тажрибали муаллимлар, фахрий устозлар учун тадбирлар ташкиллаштирилади.

Анъанага мувофиқ 30 сентябрь куни Манғит шаҳрида жойлашган файзли “Шер” тўйхонасида “Сизга таъзим, азиз устозлар!” деб номланган тадбир ўтказилди. Тадбирда муҳтарам ва халқимиз эъзозидаги инсонлар – устоз-мураббийлар учун туман ҳокимлиги ҳамда Мактабгача ва мактаб таълими бўлими томонидан байрам дастурхони ташкил қилинди.

Тантанали тадбирда туман ҳокими Собир Хўжаметов, секторлар раҳбарлари, ёшларга таълим-тарбия бериб келаётган педагог ўқитувчилар, устоз ва мураббийлар ҳамда фахрий ўқитувчилар иштирок этишди.

Ўқитувчилик масъулиятли ва машаққатли касб бўлиб, мунтазам равишда давомли меҳнатни, сабр-тоқат билан ишлашни талаб этади. Инсоният камолоти учун бутун билими, иқтидори ва ҳаётини бахш этган устозларнинг хизматларини ҳамма замонларда ҳам кишилар ҳурматлаб, эъзозлаб келишган.

Тадбир аввалида туман ҳокими Собир Хўжаметов устоз ва мураббийларни касб байрамлари 1 октябр – Ўқитувчи ва мураббийлар куни билан табриклаб, уларнинг шарафли ишларида муваффақиятлар тилади ва жорий йилда таълим соҳасида эришилган ютуқларга ҳам тўхталиб ўтди. Ёш авлод таълим-тарбияси йўлида фидокорона меҳнат қилган бир гуруҳ ўқитувчи-мураббийлар кўкрак нишонлари, ташаккурномалар ва эсдалик совғалари билан тақдирланди. Шунингдек, таълим соҳасида кўп йиллар самарали меҳнат қилган, жамоат ишларида фаол бўлган ўқитувчиларга ва шогирдлари нуфузли мусобақаларда ғолиб бўлган мураббийлар ҳам рағбатлантирилди.

Айтиш жоизки, туманимизда 85та умумий ўрта таълим мактаби мавжуд. Жорий йилда мактабларда 38 минг 813 нафар ўқувчилар маҳоратли педагоглардан таълим-тарбия олмоқда. 2022-2023 ўқув йилида 2750 нафар ўқувчилар мактабларни битказган бўлса, уларнинг 1289 нафари олий таълим муассасаларига талабаликка қабул қилинди.

Байрам тадбири давомида сўзга чиққанлар устоз сўзи замирида олам-олам маъно мужассам эканлиги, машҳур инсонларнинг юқори чўққиларга эришишлари ҳам устозларнинг беқиёс заҳмати маҳсули эканини таъкидлаб, йиғилганларни касб байрами билан қизғин қутладилар.

Чиндан-да барча даврларда ҳам ўқитувчи зиммасига ҳаёт талабларига тўла жавоб берадиган ва ўз замонига муносиб авлодларни тарбиялашдек масъулиятли вазифа юклатилган. Қуёш ўз нури билан бутун табиат, борлиқни жонлантиргани каби, ўқитувчи, мураббий ҳам бор маҳорати, илми билан ўқувчи-ёшларнинг қалбини илм зиёси билан тўлдиришга аҳд қилган буюк касб эгасидир. Ҳаётнинг гўзаллиги, фаровонлиги, одоблиги, қолаверса, давлат ва жамият равнақи муаллим меҳнати биландир.

Туман Маданият бўлими томонидан намойиш этилган катта мусиқий дастур тадбирга янада файз киритди ва барчага байрам кайфиятини улашди. Ўқитувчи ва мураббийлар кунига бағишланган байрам тадбири шўх куй-қўшиқлар ва дилрабо рақслар билан давом этди.

Туман ҳокимлиги Ахборот хизмати