ИСТЕЪМОЛЧИЛАРНИ ИЧИМЛИК СУВИ БИЛАН ТАЪМИНЛАШДА МУАММО БЎЛМАЙДИ
Амударё тумани аҳолисининг маълум қисми, яъни 81,8 минг киши марказлашган ичимлик суви билан таъминланган. Туманда жами 337,2 км. узунликда сув тармоқлари мавжуд бўлиб, 6436 хонадонга махсус автотранспортлар орқали ичимлик суви ташиб бериш йўлга қўйилган.
2021 йилда “Обод қишлоқ” ва “Обод маҳалла” давлат дастури доирасида Хитой овули ҳудудида 2та, Жумуртов шаҳарчаси ҳудудида 2та ҳамда Юқори қишлоқ маҳалласи ҳудудида 1тадан сув тозалаш шохобчаси қурилиб, аҳолининг ичимлик сув таъминоти яхшиланишига шароит яратилди.
Бундан ташқари, Амир Темур номли овул ҳудудида янгидан сув тарқатиш иншооти ва 11,2 км. сув тармоғи қурилди. Натижада Амир Темур номли ҳамда Оқ олтин овуллари ҳудудидаги сув тарқатиш иншоотлари реконструкция қилиниб, 7,9 км. узунликдаги янгидан сув тармоғини қуриш ишлари бажарилди.
Президентимизнинг 2020 йил 11 ноябрдаги тегишли Қарорига асосан 2022 йилда 35-сонли сув тарқатиш иншооти реконструкция қилиниб, 17,3 км. сув тармоғи қурилди, натижада Оқ олтин овули ҳудудидаги яна 559та хонадонни марказлашган ичимлик суви билан таъминланиш имкони яратилди.
“Обод қишлоқ” Давлат дастури асосида Тўлқин овулида 4та, Аёқчи маҳал-ласида 2та юқори қувватга эга сувни чучуклантирувчи станциялар янгидан қурилди ҳамда 550та хонадон тоза ичимлик суви билан таъминланди.
Жорий йилда Намуна МФЙ ҳудудида янгидан 1та сувни чучуклантирувчи станция қурилиши ҳамда 8,2 км. сув тармоқлари тортилиши режалаштирилган бўлиб, бу борадаги ишлар ниҳоясига етказилмоқда. Мазкур иншоотлар қуриб, битказилгач, 236та хонадоннинг ичимлик суви таъминоти яхшиланади.
Шунингдек, Қум ёп маҳалласи ҳудудида ҳам янгидан 1та сувни чучуклантирувчи станция қурилиши ҳамда 10,5 км. сув тармоқлари тортилиши режалаштирилган бўлиб, жами 332та хонадон ичимлик сув билан таъминланиши кутилмоқда.
Президентимизнинг 2023 йил 30 март кунги Қорақалпоғистон Республикасига ташрифи доирасида белгиланган режага кўра, ичимлик суви таъминотини яхшилаш мақсадида айни пайтда Беш том маҳалласи ҳудудида янгидан 11,4 км. ичимлик суви тармоғи тортиш ишлари олиб борилмоқда. Мазкур иншоотлар ишга туширилгач, 364та хонадон марказлашган ичимлик суви билан таъминланади.
Бундан ташқари, туманда ичимлик суви таъминотини яхшилаш мақсадида Осиё тараққиёт банки маблағлари ҳисобидан 2023-2026 йилларга мўлжалланган қурилиш ишлари, хусусан, Қипчоқ овули ҳудудида кунига 40000 кубометр сув тозалаш қувватига эга иншоот, Куюк кўпир овули ҳудудида янгидан сув тақсимлаш иншооти қурилиши, Ўрта қалъа овули ҳудудида РУ-1 сув тақсимлаш иншоотини реконструкция қилиш, Аёқчи, Хизр эли маҳаллалари ва Қиличбой овуллар ҳудудларида янгидан ичимлик сув тармоғи тортиш, Қиличбой сув тақсимлаш иншоотини реконструкция қилиш, шунингдек, туман ҳудудида 54,3 км. магистрал сув тармоғи, 236,5 км. кўча сув тармоқларини қуриш ишлари учун лойиҳа-смета ҳужжатлари тайёрланиб, тендер савдоларига эълон берилиши кутилмоқда.
Жорий йил куз-қиш мавсумида аҳолини узлуксиз ичимлик суви билан таъминлаш мақсадида 3та электронасос, 2та трансформаторларда, туман ҳудудидаги мавжуд ичимлик суви тармоқларида жорий таъмирлаш ишлари олиб борилди.
Ичимлик суви тармоқларида юзага келиши мумкин бўлган носозликларни бартараф қилиш учун экскаватор ва керакли асбоб-ускуналар ҳамда зарур эҳтиёт қисмлар шай ҳолатга келтирилди.
Ҳозирги кунда ичимлик суви исроф қилинишининг олдини олиш мақсадида аҳоли хонадонлари, корхона ва ташкилотлар биноларига ўрнатилган сув ўлчагич ускуналари кўздан кечирилиб, янгидан ичимлик суви тармоғига уланаётган аҳоли хонадонлари, корхона ва ташкилотлар биноларига ичимлик сувини ўлчаш ускуналарини ўрнатиш ва ичимлик сувидан оқилона фойдаланиш ҳамда исрофгарчиликнинг олдини олиш бўйича тарғибот ва ташвиқот ишлари олиб борилмоқда.
Хуршидбек ЖУМАНИЁЗОВ,
“Қорақалпоқ сув таъминоти” МЧЖ Амударё тумани филиали бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
