ТУМАНИМИЗДА “ПРEЗИДEНТ АРЧАСИ” БАЙРАМ ТАДБИРИ ЎТКАЗИЛДИ

29 декабрь куни Амударё тумани Маданият бўлимининг томошалар залида болажонларнинг энг севимли байрамларидан бири “Президент арчаси” тадбири бўлиб ўтди. Унда туман ҳокими Собир Хўжаметов, секторлар раҳбарлари, давлат ва жамоат ташкилотлари раҳбарлари, туман Мактабгача ва мактаб таълими бўлими масъуллари, мактаб ўқувчилари иштирок этдилар.

Байрам тадбирини туман ҳокими Собир Хўжаметов очиб берди ҳамда жорий йилда туманимизда барча соҳаларда амалга оширилган ишларни сарҳисоб қилиб, келгуси йил режалари хусусида, таълим муассасалари фаолиятини янада ривожлантириш борасида амалга ошириладиган вазифалар хусусида тўхталди. Шунингдек, туман ҳокими болажонларни яқинлашиб келаётган Янги йил билан қизғин қутлади ва жамоатчилик вакиллари иштирокида ота-она қаровисиз қолган 18 нафар болажонларга Президентимизнинг совғаларини топширди.

Мамлакатимизда болалар келажагимиз ворислари, миллатимиз давомчилари сифатида эъзозланади. Поёнига етаётган 2023 йил – Инсонга эътибор ва сифатли таълим йилида эртамиз эгаларини ҳар томонлама камолга етказиш борасида кенг кўламли ишлар амалга оширилди.

Давлатимиз раҳбари Шавкат Мирзиёев ташаббуси билан ёш авлодни турли ёт ғоялар, мафкуравий таҳдидлардан ишончли ҳимоялаш, уларнинг билим ва маънавиятини янада бойитишга қаратилган кенг қамровли маърифий лойиҳалар, амалий чора-тадбирлар амалга оширилмоқда.

Кам таъминланган, ота-она қаровисиз қолган болаларга меҳр ва ғамхўрлик кўрсатишга алоҳида эътибор қаратилмоқда. Янги йил арафасида кам таъминланган оилаларнинг фарзандларига кийим-кечаклар ҳамда озиқ-овқат маҳсулотлари етказиб берилиши болажонларнинг қувончига қувонч қўшди.

Жонажон Ватанимизда ҳар бир инсон азиз, унинг қадр-қиммати юксак. Шунга монанд халқимизнинг меҳри дарё, саховати уммон. Айниқса, фарзандларга меҳр-муҳаббат кўрсатиш азалий қадриятимиз. “Президент арчаси” байрам тантаналарида ҳам халқимизнинг ана шундай инсонпарварлик, меҳр-оқибатлилик каби эзгу фазилатлари яна бир бор намоён бўлади. Бу тадбир болаларга қувонч, бир умрга унутилмас хотиралар туҳфа этади.

Туман Маданият бўлими томонидан тайёрланган махсус мусиқий театрлаштирилган дастур, иқтидорли болажонлар томонидан саҳналаштирилган мусиқий чиқишлар байрам қатнашчилари эътиборига ҳавола этилди. Қизиқарли саргузаштларга бой воқеалар, куй-қўшиқлар, рақсларни ўзида жамлаган саҳна кўриниши орқали кичкинтойлар аҳиллик, ҳамжиҳатлик, меҳнатсеварлик, ҳалоллик каби инсонга зийнат бағишловчи фазилатларнинг аҳамиятини янада чуқурроқ ҳис қилдилар.

Байрам дастури давомида чиройли безатилган Арча атрофида Қорбобо ва Қорқиз, турли эртак қаҳрамонлари иштирокидаги томошалар болажонларни ватанпарварлик, дўстлик, фидойилик, тинчлик ва осойишталикнинг қадрига этиш каби эзгу ғояларга ундади.

Тадбир ниҳоясида барча болалар, ёш ижрочилар, байрам иштирокчилари жўрликда “Президент арчаси” қўшиғини ижро этди.

Янги йил муносабати билан байрам тантаналари туманимиздаги барча таълим муассасалари, меҳнат жамоаларида кўтаринки руҳда давом этмоқда.

Туман ҳокимлиги Ахборот хизмати