ТАЪЛИМ-ТАРБИЯ МУАССАСАЛАРИДА БИЛИМДОН ЁШЛАР ВОЯГА ЕТМОҚДА

Амударё тумани Мактабгача ва мактаб таълими бўлими тасарруфидаги 85та умумтаълим мактаби, 52та давлат мактабгача таълим ташкилоти, 78та оилавий ва 4та давлат хусусий шериклик асосидаги МТТларда ўқувчи-ёшларнинг билим олишлари, спорт билан шуғулланиб, ўз иқтидорларини ривожлантиришлари ҳамда МТТларда болажонларнинг яйраб ўсишлари учун барча зарур шарт-шароитлар яратилган.

Айни пайтда туман ММТБ тасарруфидаги умумтаълим мактабларида 38813 нафар ўқувчи таълим-тарбия олишмоқда. 2022-2023 ўқув йилида 78та умумтаълим мактаблари ва ихтисослаштирилган мактабни 2750 нафар ёшлар муваффақиятли битиришди. Битирувчилардан 790 нафари давлат ОТМларига, 499 нафар битирувчи белгиланган квоталар бўйича, 151 нафар ёшлар эса нодавлат ОТМларга ўқишга қабул қилиндилар. 2022-2023 ўқув йили якунларига кўра, турли тоифадаги ОТМларга ўқишга қабул қилинган битирувчилар 1440 нафар бўлиб, 52 фоизни ташкил этди.

Амударёлик битирувчи-ёшлар орасида 2022-2023 ўқув йилини алоҳида ютуқлар билан якунлаганлар кўп бўлди. 2022-2023 ўқув йилида В2, С1 сертификатларини қўлга киритган 36 нафар ўқувчи мактабни олтин, 11 нафар ўқувчи кумуш медаль билан муваффақиятли тамомладилар. 50 нафар битирувчи В2 даражали, 5 нафар ўқувчи С1 даражали сертификатлар соҳиблари бўлишди.

Ўқувчиларга жаҳон андозалари даражасида таълим-тарбия беришда юксак билим ва салоҳиятга, соҳада ўзига хос услубга эга ўқитувчилар сафи ошиб бораётгани қувонарли. Бугунги кунда халқаро ва миллий сертификатга эга ўқитувчилар 343 нафарни ташкил этади. Вазирлар Маҳкамасининг 2022 йил 2 августдаги “Халқ таълими вазири жамғармаси фаолиятини ташкил этиш чора-тадбирлари тўғрисида”ги Қарорига мувофиқ вазир жамғармаси ҳисобидан ҳар ойлик устама тўланадиган педагогларни аниқлаш мақсадида ўтказилган икки босқичли танловда 7 нафар ўқитувчи муваффақиятли иштирок этиб, 80 баллдан юқори натижаларга эришдилар. Юқоридаги Қарорга кўра, 7 нафар ўқитувчиларга ҳар ойда вазир жамғармаси ҳисобидан 5,5 млн. сўм миқдорида устама тўлаш белгиланди.

ММТБ томонидан 2022-2023 ўқув йилида битирувчилар бандлигини таъминлашга ҳам алоҳида эътибор қаратилди. 1440 нафар битирувчи ОТМлар талабаси бўлиб, таълимнинг кейинги босқичида ўқишни давом эттирмоқда.

Жорий йилда 45-сонли, 1-сонли 31-, 44-сонли ва 86-сонли мактабларида мукаммал ва жорий қурилиш-таъмирлаш ишлари амалга оширилиб, ўқитувчи ва ўқувчи-ёшлар учун зарур шароит ва имкониятлар яратилди.

Фанлар олимпиадасининг Қорақалпоғистон Республикаси босқичида 7 нафар ўқувчилар 1-, 2-, 3-ўринларни қўлга киритишди. 3-сонли мактаб кутубхонаси мудираси Тазахан Қидирниязова эса “Scientific Publication” миллий матбуот маркази, “Best Publication” илмий тадқиқотлар маркази ва “Scientific Academy” томонидан ташкил этилган “MDH yetakchilari” халқаро илмий-амалий кўрик-танловида муваффақиятли иштирок этиб, эсдалик кўкрак нишони ва махсус гувоҳнома билан тақдирланди. 40-сонли ва 36-сонли мактабларнинг физика фани ўқитувчилари Сарвар Яхшимуродов ва Хушнуд Чоршамов, 59-сонли мактабнинг кимё фани ўқитувчиси Умар Болтабоев, 32-мактабнинг тарих фани ўқитувчиси Набижон Матназаров, 52-мактабнинг она тили ва адабиёт фани ўқитувчиси Умида Худойберганова, 1-мактабнинг инглиз  тили фани ўқитувчи Муҳаббат Худойберганова, 55-сонли мактабнинг география фани ўқитувчиси Баҳодир Ўтабоевларнинг ўқувчилари фанлар олимпиадасининг туман ва Республика босқичларида ғолибликни қўлга киритдилар.

Ўзбекистон Республикаси ММТБ томонидан амалга оширилаётган “Замонавий мактаб” лойиҳаси доирасида 2022-2023 ўқув йили давомида 40-сонли мактабга 2-даражали, 32-, 33-, 22-, 48-сонли мактабларга 3-даражали “Замонавий мактаб” мақоми берилди.

Айни пайтда Амударё тумани ММТБ тасарруфидаги барча таълим-тарбия муассасаларида соҳага татбиқ этилаётган инновацион лойиҳаларни амалга ошириш, ўсиб келаётган ёш авлодни Учинчи Ренессанснинг илғор фикрли, салоҳиятли, юксак маънавиятли инсонлари қилиб тарбиялашдек шарафли ва маъсулиятли вазифани адо этиш, 2023-2024 ўқув йилининг иккинчи чораги муваффақиятли якунланиб, ўқув йилининг ҳал қилувчи учинчи чораги учун белгиланган улуғвор режаларни адо этишга қаратилган саъй-ҳаракатлар жипслик асосида, юқори савияда олиб борилмоқда.

Робия ЙЎЛДОШЕВА.