Ҳуқуқни муҳофаза қилувчи давлат органлари фаолиятини мувофиқлаштириш бўйича туман кенгашининг йиғилиши ўтказилди

2024 йил 19 январь куни Амударё тумани Маданият маркази биносида ҳуқуқни муҳофаза қилувчи давлат органлари фаолиятини мувофиқлаштириш бўйича туман кенгашининг ташкилий йиғилиши бўлиб ўтди.

Йиғилишда секторлар раҳбарлари, туман ҳокимининг биринчи ўринбосари Комилжон Айтбоев, туман ҳокими ўринбосари, Оила ва хотин-қизлар бўлими бошлиғи Гўзал Собурова, туман прокурори Азизбек Рўзметов, Ички ишлар бўлими бошлиғи Жамоладдин Юсупов, овул ва маҳаллалар фуқаролар йиғини масъуллари, ташкилотлар раҳбарлари ҳамда тегишли соҳа вакиллари иштирок этдилар.

Йиғилишни туман прокурори Азизбек Рўзметов бошқариб борди.

Йиғилишда ўтган йил давомида туманда жиноятчиликка қарши кураш ва унинг олдини олишда ҳуқуқни муҳофаза қилиш органлари фаолияти кенг муҳокама қилинди.

Таъкидланганидек, туманда умумий жиноятчилик ўтган йилга нисбатан 3,6 фоизга ошган бўлиб, шундан “оғир” ва “ўта оғир” жиноятлар 18,6 фоизга, номусга тегиш 100 фоизга, гиёҳвандлик моддалари муомаласи билан боғлиқ жиноятлар 160 фоизга, фирибгарлик 22,2 фоизга, одам савдоси 100 фоизга ҳамда йўл ҳаракати хавфсизлиги билан боғлиқ жиноятлар 25,9 фоизга ошган.

Жиноятларнинг кўпгина қисми туманнинг Дўстлик, Гулзор, А.Навоий, Беш том, Чордара, Ойбек, Босув маҳаллари, Ўрта қалъа, Куюк-кўпир, Қипчоқ, Қиличбой овулларида содир бўлган.

Йиғилишда туман Ички ишлар бўлими бошлиғи Жамоладдин Юсупов сўзга чиқиб, жиноятларни маҳаллалар кесимида таҳлил қилди. Жумладан, жиноятчилик даражаси бўйича 2023 йилда тумандаги жами 49та маҳалланинг 12таси “қизил”, 20таси “сариқ” ва 17таси “яшил” тоифаларга киритилган.

Йиғилишда прокуратура органларининг мурожаатлар билан ишлашга оид фаолияти ҳам таҳлил этилди. Жиноятчилик ва ҳуқуқбузарликларнинг олдини олиш масаласи кўриб чиқилиб, мазкур жараёнда ҳар иккала тизим масъуллари томонидан бир қатор камчилик ва нуқсонларга йўл қўйилганлиги билдирилди ҳамда камчиликлар танқид остига олинди.

Туман ҳокимининг биринчи ўринбосари Комилжон Айтбоев бугунги кунда айниқса, ёшлар ўртасида ҳуқуқбузарлик ва жиноятчиликнинг олдини олиш масаласи ёшларга оид давлат сиёсатининг устувор йўналишларидан бири эканлигини айтиб ўтди. Шу маънода ҳуқуқни муҳофаза қилувчи органлар, идора ва ташкилотлар ҳамда нодавлат ва нотижорат ташкилотлари билан бирга жамоатчилик вакиллари томонидан ёшларнинг сиёсий фаоллигини ошириш, ҳуқуқий онги ва маданиятини ривожлантириш ҳамда ёшлар ўртасида жиноятчиликни олдини олиш борасида ташкил этилаётган тарғибот-ташвиқот ишларини янада жонлантириш лозимлиги алоҳида қайд этилди.

Йиғилишда жиноятчилик ва ҳуқуқбузарликларнинг олдини олиш бўйича хато ва камчиликлар кенг муҳокама қилинди ҳамда келгусидаги вазифалар белгилаб олинди.

Туман ҳокимлиги Ахборот хизмати