АМУДАРЁ ТУМАНИДА КУТУБХОНАЧИЛАР УЧУН “БИБТЕХНИКА” ВОСИТАЛАРИНИ АМАЛИЙ ҚЎЛЛАШ БЎЙИЧА СЕМИНАР ТАШКИЛ ЭТИЛДИ

Юртимизда Мактабгача ва мактаб таълими вазирлиги томонидан умумтаълим мактаблари кутубхоналари моддий-техник базасини мустаҳкамлаш мақсадида барча ҳудудларга “бибтехника” жамланмалари етказиб берилди. Эндиликда ушбу воситалар мактаблардаги кутубхоналар фаолиятини янада такомиллаштиришда муҳим аҳамият касб этади.
Амударё туманида ҳам умумтаълим мактабларидаги кутубхоналар ходимлари иштирокида мазкур “бибтехника” воситаларини амалий қўллаш бўйича тушунчалар беришга қаратилган ўқув семинар бўлиб ўтди.
10 февраль куни Қипчоқ овулидаги 11-сонли мактабда бўлиб ўтган ушбу семинарда тумандаги 32-, 33-, 28-, 42-, 47-, 18-, 75-, 39-, 65-, 61, 74- ва 29-сонли мактабларнинг кутубхона мудиралари ва кутубхоначилари иштирок этишди. Ўқув семинарни 11-сонли мактабнинг кутубхона мудираси Меҳрибон Йўлдошева ҳамда кутубхоначиси Раъно Ешмуродовалар олиб боришди.
Умумтаълим мактабларидаги кутубхоналар фаолиятини янада ривожлантириш, кутубхоначиларнинг касбий маҳоратини ошириш ва китобхонларга сифатли кутубхона хизматини кўрсатишни йўлга қўйиш каби мақсадлар кўзланган семинар давомида мазкур воситалар ёрдамида эндиликда мактаб кутубхоналари фаолияти янада такомиллаштирилиши, моддий-техника базаси мустаҳкамлаб борилиши тўғрисида сўз юритилди.
Кутубхоначилар ҳам шу пайтга қадар иш юритуви учун зарур бўлган ҳужжатларни ўз имкониятларидан келиб чиққан ҳолда тайёрлаб келишгани, китобхонларга сифатли хизмат кўрсатиш, соҳа ходимлари фаолиятини самарали юритишда “бибтехника” воситаларининг ўрни катталигини эътироф этиб ўтишди.
Таъкидлаб ўтилганидек, “бибтехника” жамланмасида жамланма китоби, инвентарь китоби, кундалик дафтари, китобхон формуляри, “чўнтакча”, алифболи карточка, қайтарув варақаси ҳамда тўплам ғилофи сингари кутубхоналар учун зарур воситалар ўрин олган. Шу пайтгача кутубхоначиларимиз бундай воситаларни ўзлари ясаб ёки таълим муассасалари имкониятидан келиб чиқиб, тайёрлаб келишган. Энди эса республикамиз бўйича барча таълим муассасаларида кутубхоналар ишини ташкил этиш ва юритишда бир хил талаб ва стандарт йўлга қўйилмоқда. Бу, албатта, кутубхоналар иш самарадорлигини оширишга хизмат қилади.
Семинарда ёшлар қалбида китобга меҳр уйғотиш, китобхонлар сафини ошириш масалаларига ҳам тўхталиб ўтилди. Шунингдек, Мактабгача ва мактаб таълими вазирлиги томонидан умумтаълим мактаблари китоб фондини кўпайтириш, янги ўқув ва бадиий адабиётлар билан бойитишга қаратилган кенг кўламли ишлар олиб борилаётганлиги, ушбу китоблар ўқувчи-ёшларнинг дунёқарашни кенгайтириш, билимларини янада оширишда муҳим аҳамият касб этиши хусусида фикрлар билдирилди.
Ўқувчи-ёшлар қалбида юксак маънавиятни шакллантиришда китоб ва китобхонликнинг аҳамияти беқиёсдир. Шу боис юртимизда ёшларнинг китобхонлик маданиятини ошириш борасида кенг турдаги ислоҳотлар амалга оширилмоқда. Бинобарин, келажак авлоднинг камолоти, илм олиши, билимли бўлиши бир жиҳатдан уларнинг китобхонлиги билан ҳам белгиланади. Китоб асрларни-асрларга, замонларни-замонларга, ришталарни-ришталарга уловчи восита. Шунинг учун ҳар бир ёшда китоб ўқиш, ахборот олиш маданиятини янада ривожлантириш жуда катта аҳамият касб этади.
Мактаб кутубхоналари фаолиятини такомиллаштиришга бағишланган мазкур семинарда ана шундай фикр-мулоҳазалар билдирилди ва “бибтехника” воситаларидан фойдаланиш бўйича кутубхоначиларга зарур тавсиялар берилди.

О.Худойберганова.