Ҳар бир маҳаллага 500 миллион сўм: Қорақалпоғистон маҳаллаларини қўллаб-қувватлаш жамғармаси томонидан ажратилган маблағлар эвазига қандай ишлар амалга оширилди?

2023 йилнинг 30 март куни ҳудудларнинг ижтимоий-иқтисодий ривожи билан танишиш мақсадида Қорақалпоғистонга ташриф буюрган мамлакатимиз Президенти Шавкат Мирзиёев аҳоли фаровонлигини янада оширишга қаратилган 3 та янги ташаббусни илгари сурган эди.

Қорақалпоғистон саноатини ривожлантириш, қайта тикланувчи энергия манбаларини жорий этиш, аҳоли бандлигини таъминлаш, камбағалликни қисқартириш доирасида ҳудуддаги 452 та маҳалланинг ҳар бирига тўғридан-тўғри 500 миллион сўмдан қўшимча маблағ ажратилилиши белгиланди. Бунинг учун алоҳида Қорақалпоғистон маҳаллаларини қўллаб-қувватлаш жамғармаси ташкил қилиниб, унга 2023 йилда 250 миллиард сўм ажратилди.

Амударё туманидаги овул ва маҳаллаларда юртбошимиз томонидан қаратилган юксак эътибор ва ишончни оқлаш, яратилган имкониятдан самарали фойдаланиш мақсадида тизимли ишлар амалга оширилмоқда. Ажратилган маблағ овул ва маҳаллаларда инсонларнинг яшаш шароитларини яхшилашга, мавжуд камчиликларни бартараф қилишга йўналтирилмоқда.

Хусусан, Фаровон маҳалласи ҳудудидаги Халқобод кўчасидаги истеъмолчиларга хизмат кўрсатадиган трансфарматор ўрнатилди, электр линиялари тортилди ва таянч устунлари ўрнатилди. Шу орқали электр энергияси билан боғлиқ муаммаолар ҳал қилинди. Шунингдек, Кимёгарлар-4 кўчасидан Кимёгарлар-16 кўчасигача йўлларга тош ётқизилди. Бу орқали пиёдалар ва ҳайдовчилар учун йўлларда ҳаракатланиш янада осонлашди. Қолаверса, Кимёгарлар кўчасига болалар майдончаси қурилди. Фаровон МФЙ биносига қуёш панели ўрнатилди ҳамда маҳалла ҳудудидаги йўл четига пиёдалар йўлакчаси қурилди.

Ажратилган маблағ ҳисобидан Дўстлик маҳалласида ҳам хайрли ва самарали ишлар амалга оширилди. Жумладан, Дўстлик МФЙ маъмурий биносига қуёш панели ўрнатилди. Маҳалла ҳудудидаги Шўрчи, Гурлан берк кўчаларига тош ётқизилди. Шўрчи кўчасига ичимлик суви тармоқлари тортилди ҳамда Дўстлик кўчасига кузатув камералари ўрнатилди.

Бу борадаги тизимли ишлар Янгиобод маҳалласида ҳам амалга оширилди. Хусусан, мазкур маҳалла фуқаролар йиғини биносига ҳам қуёш панели ўрнатилди ва шу орқали бино электр энергияси билан таъминланди. Шунингдек, Янгиобод маҳалласи ҳудудидаги Абдулла Авлоний кўчасига янгидан электр линиялари тортилди, таянч устунлари ўрнатилди. Бу орқали ҳудуддаги фуқаролар узоқ йиллардан бери қийнаб келаётган электр энергияси таъминоти билан боғлиқ муаммолар ўз ечимини топди.

Янгиобод маҳалласи ҳудудидан ўтувчи коллекторга ўрнатилган кўприкдан, яъни маҳалланинг Фаровон маҳалласи билан чегарасидан 40-сонли умумтаълим мактабигача пиёдалар йўлакчаси қурилди. Ушбу пиёдалар йўлакчасининг қурилиши маҳалла аҳолиси, айниқса, мактаб ўқувчиларининг йўлларда ҳаракатланишларида хавсизликни таъминлашга хизмат қилмоқда.

Маҳалланинг Амударё кўчасига болалар майдончасининг қурилиши эса болажонларнинг бўш вақтини мароқли ўтказишларига замин яратди.

Бир сўз билан айтганда, Қорақалпоғистон Республикаси Вазирлар Кенгаши ҳузурида Маҳаллаларни қўллаб-қувватлаш жамғармаси томонидан ажратилаётган маблағлар маҳаллалар инфратузилмаларини такомиллаштириш, аҳолининг турмуш шароитларини янада яхшилаш, маҳаллаларни ижтимоий-иқтисодий ривожлантиришга қаратилган дастурлар ижросини ҳамда мавжуд муаммоларнинг самарали ва тезкор ҳал этилишини молиявий ва моддий жиҳатдан таъминлашда муҳим восита бўлмоқда.

Чарос Арслонова, туман ҳокимлигининг Ахборот хизмати.