Ўқитувчилар иштирокида Касаба уюшмаси кубоги учун спорт мусобақалари ўтказилди
29 апрель куни Амударё туманидаги 16-сонли умумтаълим мактабида ва минифутбол майдончасида “Беш ташаббус олимпиадаси” доирасида Мактабгача ва мактаб таълими вазирлиги тизимидаги таълим муассасалари ходимлари ўртасида “Соғлом танда – сифатли таълим” шиори остида Касаба уюшмаси кубоги учун 2-босқич спорт мусобақалари бўлиб ўтди.
Маълумки, ўқитувчиларнинг жисмоний ва руҳий саломатлигини яхшилаш, стрессни камайтириш ва ижодий потенциални ошириш мақсадида уларни спортга оммавий жалб қилиш масаласига доимий равишда эътибор қаратиб келинади. Спорт билан мунтазам шуғулланиш нафақат танани чиниқтиради, балки ўқитувчиларнинг иш самарадорлигини ҳам оширади.
Шунингдек, спорт жамоавий ишлаш кўникмаларини ривожлантиришга ёрдам беради, бу эса ўқитувчилар орасида ҳамкорлик ва ўзаро тушунишни мустаҳкамлайди. Спорт мусобақаларида иштирок этиш шунингдек, ўқитувчиларнинг ўз соғлиғига бўлган масъулиятини янада оширади ва уларга ўзларининг шахсий ва касбий ҳаётларида мувозанатни сақлашга ёрдам беради. Бундан ташқари, спорт мусобақалари ўқитувчиларга ўз мактаблари ва жамоалари билан янада чуқурроқ боғланиш имконини беради, бу эса мактабларда ижтимоий-маънавий муҳитнинг яхшиланишига ижобий таъсир кўрсатади.
“Беш ташаббус олимпиадаси” доирасида мактаблар ўқитувчиларидан иборат жамоалар иштирокида Касаба уюшмаси кубоги учун ўтказилган спорт мусобақалари муросасиз баҳсларга бой бўлди.
Кескин рақобат муҳитида ўтган мусобақалар якунларига кўра спортнинг шахмат тури бўйича аёллар ўртасида фахрли 1-ўринни 32-сонли умумтаълим мактаби ўқитувчиси Навбаҳор Шамшатова, эркаклар ўртасида эса фахрли 1-ўринни 67-сонли мактаб ўқитувчиси Ойбек Болтабаев эгаллади.
Спортнинг шашка тури бўйича эса ғолиблик аёллар ўртасида 76-сонли мактаб ўқитувчиси Роза Хидировага, эркаклар ўртасида 44-сонли мактаб ўқитувчиси Аминбой Эшимбетовларга насиб қилди.
Стол тенниси мусобақалари якунларига кўра аёллар ўртасида фахрли 1-ўринни 36-сонли умумтаълим мактаби ўқитувчиси Эътибор Бобожонова эгаллаган бўлса, эркаклар ўртасида ғолиблик 40-сонли мактаб ўқитувчиси Дониёр Юлдашевга насиб қилди.
Волейбол мусобақалари ҳам жуда қизиқарли ва ҳаяжонли ўтди. Барча босқичлар якунларига кўра 28-сонли мактаб жамоаси аёллар ўртасида фахрли 1-ўринни эгаллади. Аёллар ўртасида ўтказилган минифутбол мусобақаларида эса 7-сонли мактаб жамоасига тенг келадигани топилмади.
Ғолиб иштирокчилар ва жамоалар мусобақаларнинг 3-босқичида иштирок қилиш ҳуқуқига эга бўлдилар. Шунингдек, ғолиблар ва фаол иштирокчилар таълим ва фан ходимлари касаба уюшмаси Амударё туман бўлинмаси кенгаши томонидан дипломлар ва эсдалик совғалари билан тақдирланди.
Мусобақаларнинг тантанали ёпилиш ва ғолибларни тақдирлаш маросимида таъкидланганидек, спорт билан мунтазам шуғулланиш ўқитувчиларга ўқувчилар билан янги ва самарали мулоқот қилиш усулларини топишга ёрдам беради, бу эса таълим сифатини ошириш, мактабларда ижтимоий-маънавий муҳитни соғломлаштиришга хизмат қилади. Ўтказилган ушбу мусобақалар ҳам иштирокчи ўқитувчиларга жамиятнинг фаол аъзолари сафида бўлишга имкон яратиб, уларнинг жисмоний фаоллигини оширишга ёрдам бериши шубҳасиз.
Улуғбек Абдурахманов, Ўзбекистон таълим ва фан ходимлари касаба уюшмаси Амударё туман бўлинмаси кенгаши раиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
