KAMTARIN USTOZ VA FIDOYI MADANIYaT XODIMI

Amudaryo tumanida madaniy hayot rivojiga munosib hissa qoʻshayotgan insonlar koʻp. Ular orasida oʻzining mehnatsevarligi, kasbiy faoliyatiga nisbatan masʼuliyati va sadoqati bilan eʼtirofga loyiq boʻlgan soha vakillaridan biri Jumaboy aka Kamolovdir. U Amudaryo tumanida oʻz hayotini xalqqa sadoqat bilan xizmat qilishga, madaniy-maʼrifiy sohani rivojlantirishga bagʻishlab kelayotgan kamtarin va fidoyi ustoz sifatida tanilgan.

Yaqinda Amudaryo tumani Madaniyat boʻlimida koʻp yillar samarali mehnat qilgan, ovoz rejissyori sifatida oʻz yoʻnalishida xalqqa xizmat koʻrsatishni yuqori sifat darajasiga koʻtargan Jumaboy Kamolovning 70 yillik yubileyi keng nishonlandi. Tadbirda tuman madaniyat sohasi faxriylari va Madaniyat boʻlimi xodimlari, Jumaboy Kamolovning yaqinlari va doʻstlari, keng jamoatchilik vakillari ishtirok etdi.

Jumaboy Kamolov 1955-yil 21-noyabrda Qoraqalpogʻiston Respublikasi Amudaryo tumanining Choykoʻl qishlogʻida tavallud topgan. Bolalikdan mehnatsevarlik, odob-axloq va samimiylik kabi sifatlarni ota-onasidan meros olgan, serfarzand oilada voyaga yetgan Jumaboy Kamolov yoshligidanoq oʻz hayotida samimiylik va intizomga asoslangan turmush tarzini shakllantirdi.

U qishloqdagi 22-sonli umumtaʼlim maktabini muvaffaqiyatli tamomlab, fizika va texnikaga boʻlgan qiziqishi tufayli Nukus elektrotexnika texnikumida tahsil oldi. Texnikum tahsilidan soʻng ilk mehnat faoliyatini Amudaryo tuman Madaniyat boʻlimida ovoz rejissyori sifatida boshladi va umrining qariyb 50-yilini ushbu yoʻnalishga bagʻishladi.

Amudaryo tumani madaniyat markazida ovoz kuchaytirish moslamasini boshqarish rejissyori sifatida koʻplab yoshlarga ustozlik qilib kelayotgan Jumaboy Kamolovning ovozsozlik sohasidagi tajribasi tumanda oʻtkaziladigan davlat tadbirlarining yuksak saviyada oʻtishini taʼminlayotgani har galgi bayram tantanalaridan soʻng xalqning samimiy eʼtirofi orqali oʻz bahosini oladi. Xalqning: “Bayram zoʻr boʻldi, ayniqsa, ovoz juda tiniq, tabiiy chiqdi!” qabilidagi eʼtiroflaridan barcha madaniyat sohasi xodimlarining koʻngli togʻday yuksaladi. Bunda fidoyi inson Jumaboy Kamolovning hissasi katta boʻladi, albatta.

Jumaboy akaning feʼlidagi mehnatsevarlik, fidoyilik va samimiyat unga ota-onasidan meros. Butun umr halol mehnati bilan oila tebratgan Kamol bobo Yoʻldoshev hamda Jumabika momo Yoʻldoshevalarning oilasida tarbiya topgan Jumaboy aka Kamolov ham umr yoʻldoshi, uzoq yillar yosh avlodga ona tili va adabiyot fanidan dars bergan faxriy ustoz Gulsara opa Kamolova bilan uch qiz va ikki oʻgʻilni tarbiyalab, voyaga yetkazdi. El aro hurmat-eʼtibor topgan Jumaboy aka bugungi kunda nafaqat oʻz nevaralarining, balki oʻzi istiqomat qiladigan mahalla bolalarining ham ardoqli bobosi. Faxriy ustoz Gulsara opa esa yoshlarning sevimli maslahatgoʻyi, mahallaning koʻchaboshchisi.

Yubiley tadbirida soʻzga chiqqanlar Jumaboy Kamolovning butun hayoti va mehnat faoliyati fidoyilik, masʼuliyat va mehr-oqibatga asoslanganligini, u qaysi lavozimda ishlamasin, oʻz vazifasini sidqidildan bajarib kelganini taʼkidladilar. Tumandagi turli darajadagi tadbirlarning sifatli oʻtishi, texnik xavfsizlik va elektr uskunalarining soz holatda boʻlishida uning hissasi doimo katta boʻlib kelgan. Jumaboy aka kabi samimiy, halol va sohaga sadoqatli insonlar bor ekan, madaniyat sohasining kelajagi ham, xalqqa xizmat koʻrsatish darajasi ham yanada ravnaq topaveradi.

Ota kasbini tutgan farzandlari ham bugungi kunda tuman madaniyati sohasining zahmatkashlari. Oʻgʻillari Ikromjon va Mansurbeklar ota kasbini eʼzozlab, ular ham ovoz kuchaytirish uskunalari va texnik moslamalar bilan ishlab, xalqimizga madaniy-maʼrifiy xizmat koʻrsatib kelmoqda. Qizlarining biri tarbiyachi, biri chevar, yana biri hamshira, uchalasi ham oqila oila bekalari. Bu esa ustozning mehnati, toʻgʻri tarbiyasi va sof niyati samarasi ekanining yorqin isbotidir. Jumaboy aka tarbiyalagan shogirdlar ham juda koʻp. Ular tumanimizdagi madaniyat markazlarida faol xizmat qilib kelmoqda.

Jumaboy Kamolov madaniyat va sanʼatga umrini bagʻishlagan, oʻz bilim va tajribasini avlodlariga ulashib kelayotgan haqiqiy ustozdir. Uning insonparvarligi, vazminligi, jamoaga boʻlgan hurmati hamisha soha xodimlari va shogirdlari uchun ibrat boʻlib kelgan. Jumaboy Kamolov bugungi kunda ham faoliyatini davom ettirmoqda. U hamisha tadbirlarda faol. Uning boy tajribasi, yuksak madaniy saviyasi va yoshlarga ustozlik ruhida kechayotgan namunaviy faoliyati madaniyat sohasi rivojida muhim oʻrin tutadi. Fursatdan foydalanib, shonli 70 yillik yubileyi munosabati bilan madaniyat xodimi, faxriy ustoz Jumaboy Kamolovga uzoq umr, sihat-salomatlik tilab qolamiz.

NASIBA YeShChANOVA.