NOGIRONLAR VA BEMORLAR EʼTIBORDA

Gematologiya va qon quyish ilmiy tekshirish instituti Gemofiliya va qon tizimi Depressiyasi Markazida 17-aprel "Xalqoro Gemofiliya bemorlari kuni” xamda Toshkent shaxar nogiron gemofiliya bemorlari Jamiyati tashkil qilinganligining 15 yilligi munosabati bilan bayram tadbiri boʻlib oʻtdi.
Mazkur tadbir Gematologiya va qon quyish ilmiy tekshirish instituti xamda Toshkent shaxar nogiron gemofiliya bemorlari Jamiyati tashabbusi bilan tashkil qilindi.
Dastlab Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash Jamoat fondi tomonidan ajratilgan grant loyihasiga asosan 7 yoshdan 18 yoshgacha boʻlgan nogiron gemofiliya bemorlari oʻrtasida kompyuter savodxonligi, shaxmat, shashka, rasm chizish boʻyicha musaboqa oʻtkazildi va gʻoliblar taqdirlandi.
Shuningdek koʻngilli qon topshiruvchilar koʻmagi bilan begʻaraz donorlar aktsiyasi amalga oshirildi.
Mazkur tadbirning badiiy qismida Oʻzbek Milliy akademik teatri aktyorlari, Mahmud Ismoilov, Muqaddas Xoliqova, Sharofiddin Muzropov, shuningdek Sayyod.com internet sayti jamosi xamda xonanda Kaniza ishtirok etib, oʻzlarining shirin soʻzlari, kuy qoʻshiqlari bilan bemorlar koʻnglini xushnud etishdi.
Bemorlar uchun dasturxon yozilib oʻzbek milliy taomi osh tarqatildi. Kasalxonada davolanayotgan barcha bemor bolajonlarga sovgʻalar taqdim etildi.
Toshkent shahar nogiron gemofiliya bemorlari jamiyati Respublikamizdagi nogiron gemofiliya bemorlariga koʻrsatgan eʼtiborlari xamda "Xalqoro Gemofiliya bemorlari kuni” munosabati bilan oʻtkazilgan tadbirda ishtirok etganlari va oʻz koʻmagini ayamaganligi uchun Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash Jamoat fondiga, Oʻzbekiston Respublikasi sogʻliqni saqlash vazirligiga, Oʻzbek Milliy akademik drama teatriga, Sayyod.com internet sayti jamoasiga, xonanda Kanizaga va oʻzlarining beminnat yordamlarini koʻrsatgan barcha barchaga minnatdorchilik bildiradi.