BARChAMIZGA YOʻL KOʻRSATGAN USTOZ ERUR

Islom dini ilmu maʼrifatga targʻib qiluvchi ilohiy dindir. Zero,  insonning ikki dunyosi obod boʻlishi ilm olmogʻi va unga amal   qilishiga bogʻliqdir. Inson hayotida bilimi, maʼrifati bilan jamiyat  aʼzolari oʻrtasida qadr-qimmat va obroʻ-eʼtiborga ega boʻladi.

Tarixga nazar solsak, Odam alayhissalomning farishtalarning  taʼzimiga sazovor boʻlishi ham aynan ul zotda ilm boʻlganligidandir.

Muhammad (s.a.v.)ning oʻzlari: "Albatta, men muallim qilib  yuborilganman”, deganlar. Mana shuning oʻzi ham ustozlik qay darajada  yuksak martaba ekanligini koʻrsatadi.

Paygʻambarimiz Muhammad (s.a.v.)ga nozil qilingan dastlabki oyatlarda  ilm olishga  undash maʼnosi borligining oʻzi ham Islom ilm-maʼrifat  dini ekanligining yorqin dalilidir.

Yurtimizda har yili 1-oktyabr – Ustoz va murabbiylar kuni  umumxalq bayrami sifatida keng nishonlanadi. Ulugʻ ustozlar hamma narsadan ilmu-maʼrifatni afzal bilishgan. Butun hayotlarini ilm-maʼrifatga bagʻishlashgan. Yurtimiz qadimdan ulugʻ vatandoshlarimiz ilmi  tufayli butun dunyoga mashhur boʻlgan. 

Abu Muso Muhammad Xorazmiy, Abu Rayhon Beruniy, Abu Ali  Ibn Sino, Ahmad  Fargʻoniy, Imom Buxoriy kabi olimlar dunyo fanlariga  asos solganlar. Bunday misollarni juda koʻplab keltirishimiz mumkin. 

Mamlakatimiz ustoz va murabbiylarga ehtirom koʻrsatish, ularni  eʼzozlash, ijtimoiy imtiyozlar yaratish borasida har qanday mamlakatga namuna boʻla oladigan yurtdir. Jamiyatning koʻp qismini tashkil qiluvchi yoshlarimizga taʼlim-tarbiya berib kelayotgan ustoz va murabbiylarimizni  hamisha hurmatlashimiz  va eʼzozlashimiz lozim.

Zero, kelajak avlodning barkamol va yetuk, maʼrifatli boʻlib  yetishishlarida ularning xizmatlari kattadir. Oʻzbekiston dunyo hamjamiyatida oʻzining munosib oʻrnini egallab, taʼlim, madaniyat, sport va  boshqa   sohalarda tenglar ichra teng boʻlib, oʻz  mavqeiga ega boʻlishida ustoz va murabbiylarning oʻrni beqiyosdir. 

Ustozlarni qadrlash haqida soʻz ketganda, beixtiyor hazrati Mir   Alisher Navoiy bobomizning ushbu soʻzlari yodimizga tushadi:

Haq yoʻlida kim senga bir harf oʻqutmish ranj ila,

Aylamak boʻlmas ado oning haqin yuz ganj ila.

Haqiqatan ham, ustoz otangdek ulugʻ deb ajdodlarimiz bejiz  aytishmagan. 

Rajabboy Habibullayev, "Hoji  Eshon bobo”  jomeʼ masjidi imomi.

(Foto - http://uza.uz)