7-8-синф ўқувчилари ўртасида Ал Хоразмий номидаги аниқ ва табиий фанлар олимпиадасининг туман босқичи ўтказилди

Маълумки, фанлар олимпиадаси ўқувчининг ўз устида ишлашига ундайдиган, билим ва салоҳиятни синовдан ўтказадиган, энг кучли билим эгаларини аниқлайдиган муҳим беллашувдир. Фанлар олимпиадасида ўзи қизиққан фан бўйича иштирок этган аксарият ўқувчи ёшлар эса келажакда айнан ўша фан бўйича олий таълим муассасалари йўналишларига ҳужжат топширадилар. Демак, мазкур беллашувнинг яна бир аҳамиятли томони ўқувчининг келажакдаги касбини белгилаб, маълум йўналиш томон ихтисослашувига туртки беришида. Яқинда Амударё туманидаги 1-сонли умумий ўрта таълим мактабида 2024-2025-ўқув йилида умумий ўрта таълим мактабларининг 7-8-синф ўқувчилари ўртасида Ал Хоразмий номидаги аниқ ва табиий фанлар олимпиадасининг туман босқичи бўлиб ўтди.

Ўзбекистон Республикаси Вазирлар Маҳкамасининг 2021 йил 9 сентябрдаги “Иқтидорли ўқувчилар ўртасида фан олимпиадаларини ўтказиш тизимини жорий қилиш ва хорижий тилларни ўқитиш бўйича энг яхши мактабни аниқлаш тўғрисида”ги 562-сонли қарорида умумий ўрта таълим мактаблари ўқувчилари ўртасида маҳаллий ва халқаро фан олимпиадаларини ташкил этиш, ўқувчиларнинг халқаро олимпиадалардаги иштирокини таъминлаш тартиби белгиланган.

Қарорда келтирилган топшириқлар ижросини таъминлаш ва ўқувчиларнинг қуйи синфлардан бошлаб фан олимпиадаларига тайёргарлик кўришига замин яратиш мақсадида ташкил қилинган Ал Хоразмий номидаги аниқ фанлар олимпиадасида – математика фанидан, табиий фанлар олимпиадасида эса кимё, биология, физика фанларидан комплекс тарзда топшириқлар тақдим қилинади.

Олимпиадага туманимиздаги 86 та умумий ўрта таълим мактабларининг ва ихтисослаштирилган мактабнинг 7-8-синф ўқувчилари иштирок этишди. Бунда, аниқ фанлар йўналишида 210 нафарга яқин, табиий фанлар йўналишида 200 нафарга яқин иқтидорли ўқувчилар қатнашдилар.

Олимпиаданинг туман босқичи очилиш маросимида Қорақалпоғистон Республикаси Мактабгача ва мактаб таълими вазирлигидан Фан олимпиадаси бўйича иқтидорли болалар билан ишлаш сектори методисти Фазилат Зарифова, туман Мактабгача ва мактаб таълими бўлими бошлиғи Ялғашбой Шамуратов, бўлимнинг мактаблар фаолиятини мувофиқлаштириш шуъбаси методистлари, Амударё туман Ихтисослаштирилган мактаби директори Отабек Йўлдашов ва мазкур мактабдан жалб қилинган назоратчилар ҳамда олимпиада аудитория раҳбарлари, кузатувчилар иштирок этдилар.

Очилиш маросимида Отабек Йўлдашов, Фазилат Зарифовалар Ал Хоразмий номидаги аниқ ва табиий фанлар олимпиадаси мақсад ва вазифалари ҳақида ҳамда бу йилги олимпиадани ўтказиш тартиби ўтган йилдагидан фарқ қилиши, туман босқичи учун назорат материаллари Агентлик ҳузуридаги Фан олимпиадалари маркази томонидан тузилганлиги ҳамда олимпиаданинг ҳудудий ташкилий қўмитаси томонидан чоп этилиб, олимпиада ўтказиладиган куни жойларга етказилиши ҳамда махфийликни ва адолатни таъминлаш учун амалга ошириладиган бошқа вазифалар ҳақида айтиб ўтдилар.

Туман Мактабгача ва мактаб таълими бўлими бошлиғи Ялғашбай Шамуратов олимпиадани ўтказиш тартиб ва қоидалари ҳақида батафсил маълумотлар берди. Шундан сўнг аудитория раҳбарлари, кузатувчилар иштирокчиларни белгиланган хоналарга таклиф қилиб, Агентлик ҳузуридаги Фан олимпиадалари маркази томонидан тақдим қилинган тест китобчаси ва жавоб варақаларини ўқувчиларга тарқатдилар ва жараён бошланди.

Иштирокчи ўқувчиларга 7-8-синф учун математика фанидан 36 саволли тест китобчаси ва жавоблар варақаси, табиий фанлардан ҳам 36 саволли тест китобчаси ва жавоблар варақаси тақдим этилиб, олимпиада топшириқларни ечиш учун иштирокчиларга низом талаби бўйича 2 соат вақт берилди.

Белгиланган вақтдан кейин аудитория раҳбари томонидан иштирокчиларнинг жавоб варақалари Ихтисослаштирилган мактаб назоратчилари ва вазирлик масъул ходимига тақдим қилиниб, сейф пакетга солиб муҳрланган ҳолда Фан олимпиадалари марказига юборилди. Натижалар бир неча кун ичида Фан олимпиадалари маркази томонидан Мактабгача ва мактаб таълими вазирлигига тақдим қилинади ва натижа асосида Қорақалпоғистон Республикаси босқичи иштирокчилари аниқланиб, ғолиблар эълон қилинади.

Бу каби олимпиадалар ўтказилиши таълим муассасалари ўқувчилари орасидан аниқ ва табиий фанлар билимдонлари етишиб чиқишига хизмат қилади. Мазкур олимпиаданинг Республика босқичида муваффақиятли иштирок этган ўқувчилар келгусида халқаро миқёсида ташкил қилинадиган мусобақа ва олимпиадаларда иштирок этиб, Ўзбекистонимизнинг обрўсини янада юксалтиришга ҳисса қўшадилар.

Азиза Мадраҳимова