Аҳолини барқарор энергия билан таъминлаш чоралари кўрилмоқда

Мамлакатимизда аҳолини муносиб ҳаёт шароитлари билан таъминлаш бўйича амалга оширилаётган чора-тадбирлар барча ҳудудларда ўз самарасини кўрсатмоқда. Хусусан, Амударё туманида ҳам аҳоли ва ишлаб чиқариш субъектларини табиий газ ҳамда электр энергияси билан узлуксиз ва сифатли таъминлаш мақсадида тизимли ишлар амалга оширилмоқда. Бу борада “Ҳудудгаз Қорақалпоғистон” акциядорлик жамиятига қарашли “Амударё тумангаз” газ таъминоти бўлими ва “Ҳудудий электр тармоқлари” акциядорлик жамиятига қарашли Амударё туман электр таъминоти корхонаси томонидан бир қатор ишлар бажарилди.

Аҳолини коммунал хизматлар билан таъминлашга қаратилган мазкур жараён туман прокуратураси томонидан доимий назоратга олинган бўлиб, ҳар бир босқичда амалга оширилаётган ишлар юзасидан масъул ташкилотлар фаолияти мунтазам таҳлил қилиниб борилмоқда. Бу эса белгиланган лойиҳаларнинг ўз вақтида ва сифатли амалга оширилишига замин яратмоқда.

Туманда ҳозирги кунда 40 минг 797 нафар истеъмолчи, жумладан 15 минг 63 та хонадон ва 284 та йирик корхона табиий газ билан таъминланган. Шунингдек, 25 минг 450 та хонадонда суюлтирилган газдан фойдаланилади. Туманда салкам 500 километр газ тармоқлари мавжуд бўлиб, шундан 35,1 км юқори босимли, 152,9 км ўрта босимли ва 311,6 км паст босимли ҳисобланади. Газ қувурларининг 27,9 км қисми ер остида, 471,7 км қисми эса ер устида жойлашган.

Ҳозирги кунда туманда жами 175 та газ тақсимлаш пункти фаолият юритмоқда. Улардан 15 таси юқори босимли ва 160 таси ўрта босимли бўлиб, мазкур иншоотлар орқали аҳоли ва хўжалик юритувчи субъектларга табиий газнинг узлуксиз ва хавфсиз етказилиши таъминланмоқда. Газ тармоқлари орқали босимни меъёрда ушлаб туриш, газ оқимини назорат қилиш ҳамда уни белгиланган йўналишларга тақсимлаш вазифасини бажарадиган ушбу пунктлар газ таъминоти тизимининг узвий ва муҳим қисмидир.

Мазкур тармоқлар махсус техникалар ёрдамида текширувдан ўтказилиш жараёнида Д-273 мм диаметрга эга бўлган юқори босимли газ қувурида бир ҳолатда газ сизиб чиқиши аниқланди. Ушбу ҳолат Олмазор маҳалласи ҳудудида қайд этилган бўлиб, пайвандлаш орқали тезкорлик билан бартараф этилди.

Шу билан бирга, “Паркент тажрибаси” асосида Арна бўйи маҳалласида 18,7 км газ тармоқлари эстетик жиҳатдан тартибга келтирилди. Маҳалланинг кириш қисмида замонавий “РДБК-100” маркали янги газ тақсимлаш пункти ўрнатилиб, 5 та фильтр ва 5 та кран ҳамда зулфинлар янгисига алмаштирилди. 503 та хонадоннинг газ таъминоти икки босқичли тизимга ўтказилди.

Шунингдек, 2025-2026 йил куз-қиш мавсумида аҳолини барқарор электр энергияси билан таъминлаш мақсадида ҳам ишлар олиб борилмоқда. Ўзбекистон Республикаси Президентининг 2024 йил 20 сентябрдаги тегишли Қарори ижросини таъминлаш мақсадида Амударё туманидаги 7 та оғир ҳисобланган ҳудуд – Бобур, Амир Темур, Қангли, Уйшин, Бўз ёп, Куюк кўпир ва Оқ олтин каби овул ва маҳаллаларда электр таъминоти инфратузилмаси янгиланмоқда.

2025 йилнинг биринчи босқичи доирасида Амударё туманида электр таъминоти инфратузилмасини такомиллаштириш бўйича қатор ишлар бажарилди. Жумладан, Бобур номли овулда 160 кВА қувватга эга трансформатор пункти ўрнатилиб, 1,9 км СИП кабель тортилиши билан бирга 37 та темир бетон устун қўйилди.

Амир Темур номли овулда 2 та янги трансформатор пункти, 13,2 км кабель ва 368 та устун монтаж қилинди. Бўз ёп овулида 4 та трансформатор пункти барпо этилди, 1 км СИП кабел тортилиб, 51 та таянч устун ўрнатилди. Уйшин маҳалласида 2 та мавжуд трансформатор янгисига алмаштирилиб, 1,6 км кабел ва 57 та устун билан таъминланди.

Қангли овулида ҳам 2 та янги трансформатор пункти ўрнатилиб, 2,5 км СИП кабель тортилди, 190 та устун жойлаштирилди. Оқ олтин овулида 2 та трансформатор пункти барпо этилиб, 40 та темир бетон таянч ўрнатилди. Жами ҳисобда 12 та трансформатор пункти, 697 та устун ва 19 км СИП кабель орқали туманнинг электр тармоқлари янада мустаҳкамланди.

Аҳолини табиий газ ва электр энергияси билан барқарор, узлуксиз ва хавфсиз таъминлаш — бу фақат техник масала эмас, балки жамият фаровонлиги, иқтисодий барқарорлик ва давлатнинг халқ олдидаги ижтимоий мажбуриятининг амалий ифодасидир. Ушбу йўналишда амалга оширилаётган ислоҳотлар ва инфратузилмани такомиллаштириш ишлари, аввало, аҳоли эҳтиёжларини қондириш, шу орқали ҳудуднинг ижтимоий-иқтисодий салоҳиятини оширишга хизмат қилиши билан аҳамиятлидир.

Шоҳзод Қурбонбоев тайёрлади.