Халқ депутатлари Амударё туман Кенгашининг 16-сессияси тўғрисида ахборот

Амударё тумани ҳокимлигининг мажлислар залида еттинчи чақириқ Халқ депутатлари туман Кенгашининг навбатдаги 16-сессияси бўлиб ўтди. Сессия ишида депутатлар, туман ҳокимининг ўринбосарлари, ташкилот ва муассасалар раҳбарлари ҳамда оммавий ахборот воситалари вакиллари иштирок этди.

Сессия аввалида Ўзбекистон Республикаси ва Қорақалпоғистон Республикасининг Давлат мадҳиялари янгради. Сессия мажлисига Халқ депутатлари Амударё туман Кенгаши раиси, туман ҳокими Собир Хўжаметов раислик қилди. Сессия котиблигига “22-Босув” сайлов округидан депутат Сайлихон Муратбаева номзоди депутатлар томонидан маъқулланди.

Сессия кун тартибидаги биринчи — “2026 йилда Амударё туманини комплекс ижтимоий-иқтисодий ривожлантириш дастурини тасдиқлаш тўғрисида”ги масала юзасидан туман ҳокимининг биринчи ўринбосари, иқтисодиёт ва молия бўлими бошлиғи Фахриддин Юсупов ҳисобот берди.

Ҳисоботда ҳудудларни комплекс ривожлантириш, юқори иқтисодий ўсишга эришиш, бизнес муҳитини янада яхшилаш, “ўсиш нуқталари”ни ишга солиш, яшил тамойил ва ёндашувларни кенг жорий этиш орқали аҳоли бандлигини таъминлаш ҳамда даромадларини ошириш борасида амалга оширилаётган чора-тадбирлар ҳақида батафсил маълумот берилди. Шунингдек, 2026 йил учун Амударё тумани маҳаллий бюджети даромадлари ва харажатлари 156 миллиард 793 миллион 126 минг сўм миқдорида прогноз қилинаётгани қайд этилди.

Кун тартибидаги навбатдаги масала – “Ўзбекистон – 2030” стратегиясининг 25-мақсади ижроси, хотин-қизларнинг таълим олиши, касбий кўникмаларни эгаллаши, эрта турмуш ва ажримларнинг олдини олиш ҳамда уларни тадбиркорликка жалб этиш борасида амалга оширилаётган ишлар юзасидан туман ҳокимининг ўринбосари — оила ва хотин-қизлар бўлими бошлиғи Гўзал Сабурова ҳисобот берди.

Ҳисоботда жорий йил давомида 6-босқич “Аёллар дафтари”га киритилган 5 825 нафар хотин-қизларнинг 5 801 нафарига, яъни 99,9 фоизига амалий ёрдамлар кўрсатилгани таъкидланди. Жумладан, ижтимоий ҳимояга муҳтож ишсиз 4 722 нафар эҳтиёжманд хотин-қизлардан 4 714 нафарининг бандлиги таъминланди. Тадбиркорлик қилиш истагини билдирган 82 нафар хотин-қиздан 72 нафарига 913,5 миллион сўм миқдорида кредит ажратилди. Шунингдек, боқувчисини йўқотган 357 нафар эҳтиёжманд хотин-қизга “Аёллар жамғармаси” маблағлари ҳисобидан бир марталик моддий ёрдамлар кўрсатилди. Бундан ташқари, уй-жой таъмирига муҳтож бўлган 2 нафар хотин-қизнинг хонадонлари ҳомийлик маблағлари асосида таъмирланди.

Сессия давомида давлат тили масалалари бўйича йил давомида амалга оширилган ишлар юзасидан туман ҳокимининг маънавият ва давлат тили масалалари бўйича маслаҳатчиси Аширбай Кушаев ҳисобот берди. Унда туман ҳудудидаги 49 та фуқаролар йиғини, 125 та аҳоли пункти, 73 та қабристон, 1 та зиёратгоҳ, 1 та истироҳат боғи, 2 489 та кўча, шунингдек, транспорт, муҳандислик-техника инфратузилмаси ҳамда табиий объектларнинг географик номлари давлат реестрига тўлиқ киритилгани алоҳида таъкидланди.

Сессия кун тартибидан Амударё туман Солиқ инспекцияси томонидан амалга оширилган ишлар юзасидан солиқ инспекцияси бошлиғининг ҳисоботи ҳам ўрин олди. Ҳисоботда қишлоқ хўжалигига мўлжалланмаган ерлар учун юридик шахсларга 1 гектар майдон учун, шунингдек, жисмоний шахсларга 1 квадрат метр ер майдони учун белгиланган базавий солиқ ставкаларига нисбатан камайтирувчи ва оширувчи коэффициентлар қўллаш масаласи депутатлар томонидан кўриб чиқилди.

Маълумки, Ўзбекистон Республикаси Конституциясининг янги таҳрирдаги 120-моддасида белгиланган нормаларга мувофиқ, халқ депутатлари Кенгашига депутатлар орасидан сайланган раис бошчилик қилиши белгиланган бўлиб, 2026 йил 1 январдан бошлаб барча туман ва шаҳар Кенгашларида ҳокимларнинг бир вақтнинг ўзида Кенгашга раислик қилиши амалиёти тўхтатилиши белгиланган.

Мазкур нормалардан келиб чиқиб, сессияда “Маҳаллий давлат ҳокимияти тўғрисида”ги Қонуннинг тегишли моддасида белгиланган тартибда Амударё туман Кенгаши раиси сайлови ўтказилди. Сиёсий партиялар вакиллари гуруҳи ташкил этилиб, унинг таркиби депутатлар томонидан бир овоздан тасдиқланди. Энг кўп депутатлик ўрнига эга бўлган Ўзбекистон Либерал-демократик партияси вакили Мадамин Казаков сиёсий партиялар гуруҳи раиси этиб белгиланди.

Маслаҳатлашувлар якунида гуруҳ томонидан депутат Алишер Йўлдашев номзоди Амударё туман Кенгаши раислигига тавсия этилди. Номзод депутатлар томонидан маъқулланиб, овоз бериш натижаларига кўра Йўлдашев Алишер Ялғашевич Халқ депутатлари Амударё туман Кенгаши раиси этиб сайланди.

Янги сайланган Кенгаш раиси ўз нутқида ҳудудни ҳар томонлама ривожлантириш, аҳолининг турмуш даражасини ошириш маҳаллий Кенгаш фаолиятининг устувор вазифаси эканини таъкидлаб, маҳаллий ижро ҳокимияти билан ҳамкорликда белгиланган вазифаларни самарали амалга ошириш йўлида барча куч ва имкониятларини сафарбар этишини билдирди.

Сессия кун тартибига киритилган барча масалалар атрофлича муҳокама қилиниб, тегишли қарорлар қабул қилинди. Шу билан Халқ депутатлари Амударё туман Кенгашининг 16-сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.