Тўйларнинг аввалги файзи яна қайтса...
Болалик шундай беғубор даврки, ҳамма воқеалар, ҳодисалар худди мўъжизадек туюлади. Салга кўнгил осмон қадар юксалса, салгина кўнгилсизлик вужудингизни ларзага солади.
Инсон болаликдан қанчалик узоқлашса, шунчалик бу хотиралар тотли туюлаверади.
Манғит шаҳрининг Гўна қалъаси ҳудудидаги кўчалардан юрсам, ҳар гал болалик хотираларим эсимга тушаверади. У пайтларда телевизор тугул радио ҳам саноқлигина оилаларда бор эди. Биз болалар тўйлардагина қўшиқ тинглаб, томоша кўрар, кейинчалик буни кўп вақтларгача эсимиздан чиқармай, тўй билан боғлиқ хотираларимизни бир-биримизга айтишиб юрардик. У пайтларда Манғит ҳозиргидан анча кичкина, хонадонларнинг барчасининг ҳам қурли, томошали тўй бераверишга қурби етмас, хуллас, у тўйдан бу тўйга соғиниб, кутиб, етар эдик.
Биз болаларнинг у пайтларда ўғил уйлантириш ё суннат тўй бўлса, қандай тўй бўлишига қараб, ўйналадиган ўйинларимиз бўлар эди. Масалан, қиз узатилиб кетаётган ё келин келаётган бўлса, ўн-ўн беш чоғли болалар йиғилиб, келин минган машина олдига хода тутиб, йўл бермай туриш, йўлни очинг, дея янгаларнинг қатлама, патир, ширинликлар улашиб ялинишлари, кейин четга чиқиб, янгаларнинг берган неъматларини талашиб-тортишиб улашишлар, суннат тўйларда суннат қилинадиган болаларни яшириб қўйиб, қаердалигини айтмай қочишларимиз, тўй эгасининг жўрангизни топиб берсангиз - шу сизларники, деб бирлик пулни кўрсатгач, пулни олиб, суннат қилинадиган болани гўёки тополмаётгандек, бошқа ерлардан излаб, катталарни сарсон қилишларимиз биз учун жуда завқли бўлар эди.
Шуларни ўйлаб ўтириб, ҳозир бир нарсага ўзим ажабланаман: эшигига тўйга айтувчи келса ҳам қувонадиганлар камайиб кетаяпти. Қолаверса, ҳозир деярли айтувчи келмайдиям, қўл телефони бор, телефонда айтилади. Кимнинг тўйига борсангиз ҳам ўша хонанда, ўша бошловчи, ҳар куни айтиладиган гаплар ҳам ўша-ўша.
Эҳтимол, шунинг учун ҳам кун сайин тўйлар зерикарли, таъсирсиз бўлиб бораётгандир? Ортиқча сарф-харажатлар, спиртли ичимликлар ҳам тўй файзини кетказаётгандек.
Тўйларни, маросимларни, оилавий тантаналарни ихчам, дабдабасиз ўтказиш борасида билдирилаётган фикрлар тўйларга янгича маъномазмун бахш этишига кўнгилда умид уйғотади. Қолаверса, бу барчага бирдай боғлиқ, шундай эмасми?..
Йўлдош БОЛТАБОЕВ, меҳнат фахрийси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
