Туманимиздаги 1-сонли мактабгача таълим ташкилоти - намунали таълим-тарбия маскани

Мамлакатимизда ёш авлоднинг таълим-тарбия олишларига аълоҳида эътибор қаратилиб, кенг қамровли ислоҳотлар амалга оширилмоқда. Эртамиз эгаларининг ҳар томонлама етук, баркамол бўлиб вояга етишида боғча ёшидан сифатли таълим-тарбия олишлари муҳим аҳамиятга эга эканлиги инобатга олиниб, мактабгача таълим тизимини янада ривожлантириш борасида тизимли ишлар қилинмоқда.

Амударё туманидаги 1-сонли давлат мактабгача таълим ташкилоти фарзандларимизнинг сифатли бошланғич таълим-тарбия олишларида намуна кўрсатиб келаётган ташкилотлардан бири ҳисобланади. Навоий маҳалласида жойлашган мазкур тарбия маскани биноси 1992 йилда барпо этилган. Ҳозирда 260 ўринга мўлжалланган тарбия масканида 15 та гуруҳларда болажонлар таълим-тарбия олишмоқда. Мазкур гуруҳларнинг 13 таси асосий ҳамда 2 таси қисқа муддатли гуруҳлар бўлиб, айни пайтда жами 350 нафар болалар тарбияланмоқда.  Шуларнинг 300 нафари асосий гуруҳлардаги, 50 нафари қисқа муддатли гуруҳлардаги тарбияланувчилар ҳисобланишади.

Ҳозирда мактабгача таълим ташкилотида жами 76 нафар ходимлар фаолият юритмоқдалар. Уларнинг 37 нафари педагог, 39 нафари техник ходимлар ҳисобланади. Ушбу педагог ходимларнинг 15 нафари олий маълумотли, 22 нафари ўрта махсус маълумотга эга. Шунингдек, 2019 йилда 2 нафар педагоглар – Ойдин Казакова ва Ҳамида Ҳайтбаевалар  иккинчи малака тоифасига эга бўлдилар.

Маълумот тариқасида келтириш жоизки, туманимизда жорий йилнинг июль ойи ҳолатига жами 117 та мактабгача таълим ташкилотлари мавжуд бўлиб, шундан, 51 таси давлат, 4 таси давлат-хусусий шерикчилик асосидаги ва 62 таси нодавлат оилавий мактабгача таълим ташкилотлари ҳисобланади.

Бугунги кунга қадар туманда 3-7 ёшгача бўлган, яъни мактабгача таълим ёшидаги болалар сони 16 минг 682 нафарни ташкил қилади. Шундан давлат мактабгача таълим ташкилотларига 9 минг 466 нафар, давлат хусусий шерикчилик асосидаги мактабгача таълим ташкилотларига 285 нафар, оилавий нодавлат мактабгача таълим ташкилотларига 1 минг 520 нафар болажонлар қамраб олинган. Жами мактабгача таълим ташкилотларига қамраб олинган болалар сони 11 минг 271 нафар бўлиб, қамров кўрсаткичи 67,6 фоизни ташкил қилади.

Мактабгача таълим ташкилотларида болаларга таълим-тарбия беришда Ўзбекистон Республикасининг “Мактабгача таълим ва тарбия тўғрисида”ги Қонуни, Ўзбекистон Республикаси Вазирлар Маҳкамасининг “Мактабгача таълим ва тарбиянинг давлат стандартини тасдиқлаш тўғрисида”ги қарорига асосланган ҳолда самарали ишлар олиб борилмоқда. Қолаверса, “Илк қадам” давлат ўқув дастури ҳамда 6 ёшдан 7 ёшгача бўлган болаларни мактаб таълимига тайёрлаш бўйича “Илм йўли” вариатив дастури асосида тизимли ишлар амалга оширилмоқда.

1-сонли давлат мактабгача таълим ташкилотида таълим-тарбия жараёнинг тўғри ташкил этилиши ҳамда меҳнаткаш, масъулиятли ва изланувчан ходимларнинг самарали хизматлари натижасида катта ютуқлар қўлга киритилмоқда.

Жумладан, 1 июнь “Халқаро болаларни ҳимоя қилиш” кунига бағишлаб туманимиздаги мактабгача таълим-ташкилотлари ўртасида “Ўзбекистон – умумий уйимиз” мавзусида ўтказилган асфальтга расм чизиш бўйича кўрик-танловнинг туман босқичида 1-сонли давлат мактабгача таълим ташкилоти тарбияланувчилари фаол иштирок этдилар ҳамда фахрли 1-ўринни эгалладилар.

Шунингдек, туман Мактабгача таълим бўлими томонидан ташкил этилган “Йилнинг энг яхши тарбиячиси” касбий кўрик-танловининг туман босқичида “Энг яхши ижодкор тарбиячи” номинацияси бўйича мазкур тарбия маскани тарбиячиси Моҳира Бозорбоева фаол иштирок этиб, танловнинг Республика босқичига йўлланмани қўлга киритган.

Мактабгача таълим ташкилотида таълим-тарбия жараёни тўғри йўлга қўйилган бўлиб, ҳар бир боланинг индивидуал имкониятларини, қобилиятларини, хоҳиш-истакларини, эҳтиёжларини ҳисобга олган ҳолда таълим ҳамда тарбия берилмоқда.

Шунингдек, тарбия масканидаги машғулотлар хорижий мамлакатлар тажрибаси, илм-фан ютуқларини ўрганган ҳолда ҳамда илғор педагогик технологиялар ва замонавий ахборот-коммуникация технологияларини жорий этган ҳолда ташкил қилинади. Бу каби самарали ишлар натижасида фарзандларимиз ҳар томонлама етук, баркамол, Ватан тараққиётига муносиб ҳисса қўшадиган авлод бўлиб вояга етишлари шубҳасиз.

Чарос Арслонова, туман ҳокимлигининг Ахборот хизмати раҳбари.