15-СОНЛИ МАКТАБДА “МЕНИНГ КЕЛАЖАКДАГИ КАСБИМ” ШИОРИ ОСТИДА КАСБЛАР ФЕСТИВАЛИ ЎТКАЗИЛДИ

Умумтаълим мактабларида битирувчиларни қизиқиши ва иқтидорига кўра аниқ касб танлашларига кўмаклашиш, яратилган шарт-шароитлардан оқилона, унумли фойдаланишга ундаш орқали йўл кўрсатиш уларнинг мустақил ҳаётга қадам қўйишларида муҳим аҳамият касб этади. Касбни тўғри танлаган тиришқоқ, шижоатли ёшлар таълимнинг келгуси босқичида ҳам илм сирларини, касб-ҳунарни пухта эгаллаб, ўз олдиларига қўйган эзгу мақсадлари сари дадил одимлайверади.
Шу йил 18 декабрь куни 15-сонли умумий ўрта таълим мактабда ўқувчиларни касб-ҳунарга йўналтириш мақсадида “Менинг келажакдаги касбим” шиори остида касблар фестивали ўтказилди. Фестивалда тумандаги бошқа мактаблар директорлари, психологлари ва ўқувчилари иштирок этдилар. Шунингдек, турли касб эгалари, яъни Қиличбой қишлоғидаги тадбиркорлик билан шуғулланувчи касб эгалари, чилангарлик, автомобилларга хизмат кўрсатиш устаси, ёнғин хавфсизлиги ходими, ҳарбийлар, ҳудуддаги 7-сонли оилавий поликлиника ходимлари ҳам ташриф буюрдилар.
Фестивални 15-сонли мактаб директори Муроджон Болтаев очиб берди ва мамлакатимизда ёшларнинг пухта билим олиши, ўзлари танлаган касб-ҳунарни эгаллаши, иқтидор ва салоҳиятини тўлақонли юзага чиқариши учун барча шароитлар яратилганини таъкидлаб ўтди. Шу билан бирга мамлакатимизда узлуксиз таълим тизимини юксалтириш ва баркамол авлодни ҳар томонлама етук ва баркамол комил инсон қилиб тарбиялаш мақсадида таълим соҳасида кўплаб ислоҳотлар амалга оширилаётгани, мактабдаги шароит, олиб борилаётган ишлар ҳақида сўз юритди.
Таъкидланганидек, ёшлар келажакда жамият ривожида ўз ҳиссаларини қўшиши, комил инсон бўлиб етишишларида ўз хоҳиши, мойиллиги, қобилиятига мос касб-ҳунар танлашлари муҳим аҳамият касб этади. Ўқувчиларнинг имкониятлар ва қизиқишларини ҳисобга олган ҳолда уларнинг жадал интеллектуал ривожланиши чуқур, соҳалаштирилган, табақалаштирилган касбга йўналтирилган таълим олишини таъминлайди.
Зеро, ўқувчиларни касб-ҳунарга йўналтириш ишлари таълим-тарбия билан узвий кечадиган, унинг барча қирраларини қамраб оладиган узлуксиз жараёндир. Ўқувчиларнинг қизиқишлари, лаёқатлари, қобилиятлари ва индивидуал хусусиятларини ривожлантириш касб-ҳунарга йўл олаётган ҳар бир ўсмир учун жуда муҳимдир. Бундай тадбирлар ўқувчиларнинг касбий қарор қабул қилиши, онгли равишда касб танлашига йўналиш бериши билан аҳамиятлидир.
Тадбирга ташриф буюрган турли касб эгалари ўз касблари ҳақида тушунчалар бердилар. Тадбиркорлар уларга тадбиркорлик фаолиятини бошлаш, имтиёзли кредит олиш тартиби хусусида маълумотлар, тавсиялар бериб, йўл-йўриқ кўрсатдилар.
Фестиваль жараёнида мактабдаги “Дурадгорлик”, “Бичиш-тикиш”, “Ошпазлик”, “Қандолатчилик”, “Ёш химиклар”, “Мунчоқ тўқиш”, “Ёш гулчилар” каби тўгараклар раҳбарлари ва ўқувчилар ташкил этган кўргазмалар барчага манзур бўлди ва катта қизиқиш уйғотди.
Тадбир давомида битирувчи ўқувчилар олий таълим ўқув юртларида ўзлари танлаб олган таълим йўналиши бўйича билим савияларини ошириш ҳамда фанни чуқур ўрганишга қаратилган махсус кўникмаларини ўзларида шакллантириш имкониятига эга бўлишлари ҳақидаги кенг маълумотларга ҳам эга бўлдилар.
Фестиваль давомида мактабнинг бошланғич синф ўқувчилари қўғирчоқ театри томошаларини ижро этиб, тадбирга байрамона кайфият бахш этдилар.

Искандар Искандаров, 15-сонли мактаб директорининг

маънавий-маърифий ишлар бўйича ўринбосари.