Мактабгача таълим ташкилотида семинар-тренинг бўлиб ўтди

Мамлакатимизда ўсиб келаётган авлодни ҳар томонлама етук қилиб вояга етказиш, таълим-тарбия жараёнига таълимнинг самарали шакллари ва усулларини жорий этиш мактабгача таълим ташкилотлари зиммасига улкан масъулият юклайди.

Узлуксиз таълимнинг бош бўғини ҳисобланмиш мактабгача таълим ташкилотларининг асосий вазифаси болани соғлом, ҳар томонлама ривожланган ва эркин шахс сифатида шакллантириш, болаларнинг қобилиятларини аниқлаб, ривожлантириш, таълим олишга бўлган интилишини тарбиялашдир.

Бундай устувор вазифаларнинг ижросини таъминлаш учун бутун мамлакатимизда бўлгани каби Амударё туманида фаолият юритаётган мактабгача таълим ташкилотлари ҳам малакали педагог ва тиббиёт ходимлари билан таъминланган.

Яқинда туманнинг Тўлқин овулидаги 23-сонли мактабгача таълим ташкилотида “Ўзбекистон Республикасининг илк ва мактабгача ёшдаги болаларни ривожланишига қўйиладиган Давлат талаблари” ва “Илк қадам” давлат ўқув дастури, “Боланинг ривожланиш харитасининг юритилиш қоидалари” мавзусида ўтказилган семинар-тренинг ҳам ҳудуддаги мактабгача таълим ташкилотлари фаолияти самарадорлигини янада оширишга қаратилди.

Семинар-тренингда ташкилот ходимларидан ташқари овул ҳудудидаги барча мактабгача таълим ташкилотлари раҳбарлари ва педагоглари иштирок этдилар.

Тадбирда мактабгача таълим ташкилотларида таълим дастурларини ишлаб чиқиш, боланинг ривожланиш харитасини юритиш тартиби ҳақида, шахсга йўналтирилган ёндашув асосида таълим жараёнини режалаштириш, ташкилотнинг оилалар ва маҳаллий жамоатчилик билан ўзаро ҳамкорлиги юзасидан туман мактабгача таълим бўлимининг таълим-тарбия сифатини таъминлаш ва методик хизмат кўрсатишни ташкил қилиш шўъбаси мудири Нодира Тожимуродова маъруза қилди. У ўз сўзида мактабгача таълим ташкилотлари фаолияти самарадорлигига эришиш борасида қабул қилинаётган ҳукуматимиз, Президентимизнинг қарорлари, бундан кўзланаётган асосий мақсад узлуксиз таълимнинг илк босқичи ҳисобланган мактабгача таълим сифатини ошириш, болаларни мактаб таълимига тайёрлаш эканлигига кенг тўхталди.

Шунингдек, мактабгача таълим ташкилотларида таълим дастурларини ишлаб чиқиш, “Илк қадам” давлат ўқув дастури асосида машғулотларни самарали ташкил этиш ва бунда ҳар бир тарбияланувчининг фаол иштирок этишига эришиш лозимлигига эътибор қаратди, машғулотлар давомида болаларга индивидуал ёндашув уларнинг қобилиятларини юзага чиқишига асос бўлиши таъкидланди.

Тадбирда 23-сонли мактабгача таълим ташкилоти тарбиячиси “Шахсга йўналтирилган ёндашув асосида таълим жараёнини режалаштириш” мавзусида тушунча берди ва шу мавзуда нашр қилинган китоб тақдимотини ўтказди. Семинар-тренингда иштирокчиларининг билимлари ва кўникмалари ҳам синовдан ўтказилди. Шунингдек, “Ўйин орқали таълим олиш” мавзусида тақдимот ўтказилди. Бунда таълим жараёнида болаларга ўйин орқали таълим бериш, болалар билан ўтказиладиган ўйин турлари, уларнинг мақсадлари ва вазифалари кенг тушунтирилди.

Шунингдек, тадбирда мактабгача таълимга доир бошқа қўлланмалар тақдимоти ҳам ўтказилди. Семинар-тренингда иштирокчилар ўзларининг фаолиятига доир кўпгина билимларга эга бўлдилар.

Ойгул РАЖАБОВА.