“Ёшлар – янги Ўзбекистон бунёдкорлари” лойиҳаси муваффақиятли амалга оширилмоқда

Амударё туманида фаолият олиб бораётган “Жайхун илҳомлари” нодавлат нотижорат ташкилоти томонидан амалга оширилаётган “Ёшлар – янги Ўзбекистон бунёдкорлари” лойиҳаси календарь режаси бўйича туман мактабларида, корхона, ташкилотларда, овул фуқаролар йиғинларида ёшлар тарбиясига оид турли тадбирлар, учрашувлар ўтказилиб келинмоқда. Мазкур лойиҳа асосида иш бошланганидан бери ташкилот томонидан ўтган йилнинг сентябрь ойидан буён мактабларда 11 маротаба, овул ва маҳалла фуқаролар йиғинларида 7 маротаба тадбирлар учрашувлар ўтказилди. Бу тадбирларда шифокорлар, имомлар, мактабларнинг маънавият тарғиботчилари, фаол ёшлар иштирок этмоқда.

Шунингдек, мактаб ўқувчилари орасидан иқтидорли ижодкор ўқувчиларни излаб топиш мақсадида 4 маротаба иншолар танлови эълон қилинди ва танлов ғолиблари аниқланиб, ташкилот томонидан рағбатлантирилди. Ташкилот қошида “Кўнгил мулки” лойиҳаси шакллантирилиб ёш ижодкорларни излаб топиб, уларнинг ижодини кенг оммага ёйиш кўзда тутилиб, ижобий натижалар қўлга киритилмоқда.

Навбатдаги “Ёшлар ўртасида соғлом турмуш тарзи кўникмаларини кенг тарғиб қилиш, уларни гиёҳвандлик, ичкиликбозлик, турли ахлоқсизликлардан ҳимоя қилиш” мавзусидаги давра суҳбати 6-сонли мактабда ўтказилди. Давра суҳбатида шифокорлар, маънавият тарғиботчилари, фаол ёшлар, мактаб ўқувчилари иштирок этдилар.

Давра суҳбатини 6-сонли мактабнинг маънавият тарғиботчиси Ширин Тожибоева кириш сўзи билан очди ва бошқариб борди. У ўз сўзида мактабда соғлом турмуш тарзини яхшилаш бўйича олиб борилаётган ишлар бўйича маълумот бериб ўтди.

“Жайхун илҳомлари” нодавлат нотижорат ташкилотининг раиси Ўрозали Рейимов грант лойиҳасининг мазмун-моҳияти, аҳамияти лойиҳа доирасида амалга ошириладиган ишлар ва улардан кутилаётган натижалар ҳақида гапириб ўтди.

Ҳудуддаги 4-сонли оилавий поликлиниканинг терапевт шифокори Гулнора Саидова ёшлар ўртасида соғлом турмуш тарзи кўникмаларини кенг тарғиб қилиш мақсадида гиёҳвандлик, ичкиликбозликнинг ёмон оқибатлари ҳақида кенг турда тушунтириш бериб ўтди.

Давра суҳбатида мактабнинг 7 “Б” синф ўқувчиси Ҳулкарой Ражабова ўзи ёзган она ҳақидаги шеърини ўқиб берди. 8 синф ўқувчиси Оғабек Қурбонбоев қўшиқ айтиш, 4 А синф ўқувчиси Дилнура Аллаярова шеър ёзиш иқтидорини намойиш қилди. 9-синф ўқувчиси Жасурбек Исмоилов дурадгорлик касбига қизиқишини билдириб ўзи ясаган митти уй-рўзғор буюмларини барчага таништирди. 9-синф ўқувчиси Асилбек Саъдуллаев рассомлик санъатига қизиқиб суратлар чизаётганлигини билдирди. Рассомлик йўналишидаги ишлари билан барчани таништирди. Мамлакатимиз президенти томонидан илгари сурилган 5 та муҳим ташаббус мактаб ўқувчилари томонидан жуда ижобий қабул қилинган. Мактабда бу 5 та муҳим ташаббус асосида турли йўналишларда тўгараклар ташкил қилинган. Айниқса бадиий ижод йўналишидаги рақс тўгараки қизларининг чиқишлари барчада улкан қизиқиш уйғотди.

Ёшлар ўртасида соғлом турмуш тарзи кўникмаларини кенг тарғиб қилиш, ўқувчиларни гиёҳвандлик, ичкиликбозлик, турли ахлоқсизликлардан ҳимоя қилиш борасида бундай давра суҳбатларини тез-тез ўтказиб туриш муҳим аҳамият касб этади.

Ў.Реимов