СУД МАСЪУЛЛАРИ ЁШЛАР БИЛАН УЧРАШДИ

Суд масъуллари томонидан адолатни таъминлаш билан бирга доимий равишда аҳолининг ҳуқуқий онги ва ҳуқуқий маданиятини ошириш бўйича тадбирлар ташкил этилиб келинмоқда. Айниқса, ёшлар билан учрашувлар ўтказилиб, амалдаги қонун ҳужжатлари ва уларнинг мазмун-моҳияти тўғрисида кенг тушунчалар, маълумотлар берилиб борилмоқда.

29 март куни Амударё туманидаги 56-сонли мактабда тумандаги судлар масъуллари ўқувчи-ёшлар билан учрашув ўтказишди. Тадбирда Жиноят ишлари бўйича туман суди масъуллари, Фуқаролик ишлари бўйича туман суди раиси Қайрулла Атамурадов, Адлия бўлими бош маслаҳатчиси Жамшид Бекимбетов, Юридик хизмат кўрсатиш маркази бошлиғи Нилуфар Жуманиёзова ҳамда Дурунки маҳалла фуқаролар йиғини масъуллари, ёшлар етакчиси қатнашишди.

Тадбирда ҳуқуқшунослар Ўзбекистон Республикаси Конституцияси, “Коррупцияга қарши курашиш тўғрисида”ги, “Одам савдосига қарши курашиш тўғрисида”ги, “Ҳуқуқбузарликлар профилактикаси тўғрисида”ги Қонунлар, Жиноят кодекси, Маъмурий жавобгарлик тўғрисидаги кодекс кабилар тўғрисида батафсил маълумотлар беришди. Президентимизнинг 2021 йил 6 июлдаги “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Фармони, “Бола ҳуқуқлари кафолатларини янада кучайтиришга оид қўшимча чора-тадбирлар тўғрисида”ги Қарорининг маъмун-моҳияти тушунтирилди.

Олий Мажлиснинг 2022 йил 4 февралдаги “Интернет жаҳон ахборот тармоғида ёшлар ва вояга етмаганлар учун миллий контентни ривожлантириш, уларнинг ижтимоий тармоқлардан фойдаланиш маданияти ва зарарли ахборотдан ҳимоя қилиш масалалари юзасидан Ўзбекистон Республикаси Вазирлар Маҳкамасига парламент сўрови юбориш ҳақида”ги қарорида кўрсатилган талабларни баён этди.

Учрашув давомида ёшлар билан яқиндан суҳбатлашган, уларнинг соҳага оид, ёшларга берилаётган саволларига жавоб берган ҳуқуқшунослар уларга илм олиш учун доимий ҳаракатда бўлишлари лозимлигини алоҳида таъкидлади.

Ёшларимизда юртга даҳлдорлик, муносиб келажак авлодни тарбиялаш, билимга чанқоқлик ва меҳнатсеварлик фазилатларини шакллантириш борасида фикр юритилди. Бунинг учун ёшларимиз мавжуд имкониятлардан оқилона фойдаланиши, албатта, китобга меҳр қўйиши, доимий равишида китоб мутолаа қилиб, ўз билим ва маънавиятини ошириб бориши, ёт ғояларга берилмаслик, ёшлар ўртасида ҳуқуқбузарлик ва жиноятчиликнинг олдини олиш кабилар борасидаги мулоҳазалар ўртага ташланди. Шунингдек, мунтазам равишда спорт билан шуғулланиб туриши кераклиги алоҳида айтиб ўтилди.

Жамиятда ёшларнинг ҳуқуқий онги ва ҳуқуқий маданиятини юксалтириб бориш давр талаби ҳисобланади. Қонун устуворлигини таъминлаш ҳамда қонунийликни мустаҳкамлаш, ёшларни Ўзбекистон Республикаси Конститутцияси ва бошқа  қонун ҳужжатларига ҳурмат руҳида тарбиялашда ҳуқуқни муҳофаза қилувчи идоралар масъуллари томонидан ўтказилаётган бу каби тадбирлар, учрашув ва давра суҳбатлари бу борада муҳим аҳамият касб этади.

Жасур Ўразбоев, Жиноят ишлари бўйича туман суди раиси.