“ОНА ТИЛИМ ЖАРАНГИ ОЛАМ УЗРА ТАРАЛГАЙ” МАВЗУСИДАГИ ТАДБИР ЎТКАЗИЛДИ

Тил – миллатнинг юзи, ор-номуси, шаъни ва ифтихори. Ватанга муҳаббат – она тилига муҳаббатнинг тимсоли, халқ ва миллатга буюк эҳтиромнинг ифодасидир. Она тилини севган, унинг қадр-у қимматини ҳамиша баланд тутган миллатнинг келажак уфқлари ёрқиндир.

Асрлар давомида камситилган, турли даврлар силсиласида қадри топталган ўзбек тили ўзининг буюклигини, ҳеч қачон синмаслигини маънавий-маърифий жиҳатдан баркамоллигини сақлаб қолган гўзал ва жарангдор тил – миллонлаб инсонлар учун алоқа воситаси сифатида дунё миқёсида ўз нуфузига эга. Буни муҳтарам Президентимизнинг халқаро миқёсдаги анжуманлар минбаридан ўзбек забонида нутқ сўзлаганларидан, Президентимизнинг глобал муаммоларни ҳал қилиш борасидаги таклиф ва ташаббусларини жаҳоннинг етакчи сиёсатдонларига ўз она тилида ифода этганларидан аёнки, она тилимизнинг нуфузи йил сайин ошиб бормоқда. Бугунги кунда 50 млн.дан зиёд инсонлар ўзбек тилида сўзлашадилар. Россия, Япония, Жанубий Кореа, АҚШ, Германия, Ҳиндистон, Бангладеш каби мамлакатлар халқлари орасида ўзбек тилини ўз она тиллари каби мукаммал ўрганаётган ёшлар билан биргаликда кекса авлод вакилларининг ҳам борлиги биз ўзбек халқи қалбига чексиз ифтихор бахш этади.

Ўзбек тилига давлат тили мақоми берилган қутлуғ сана – 21 октябрь мамлакатимиздагина эмас, жаҳоннинг турли ҳудудларида тилимизга, халқимизга ҳурмат ва эҳтиром ифодаси сифатида ҳар йили кенг нишонланади. Айниқса, она Ўзбекистонимизнинг ҳар бир шаҳар-у қишлоғида, таълим-тарбия муассасалари, давлат ташкилотларида, маҳаллаларда, ҳатто оилаларда ҳам она тили байрами муносабати билан китобхонлик, шеърхонлик кечалари, билимдонлар баҳслари, тилимиз тарихига оид давра суҳбатлари анъанавий тарзда ташкил этилади.

Ана шундай тадбирлардан бири 16-сонли умумтаълим мактабида ҳам ўтказилди. “Она тилим жаранги олам узра таралгай!” мавзусидаги маънавий-маърифий, адабий-мусиқий тадбирда мактабнинг 6-, 7-, 8-синфлар ўқувчилари, мактаб ўқитувчилари иштирок этишди.

Ўқувчилар томонидан тайёрланган кўргазмали воситалар, ўзбек тили тарихига оид адабиётлар, мумтоз ва ҳозирги замон ўзбек адабиёти намоёндаларининг асарлари, она тилининг тараққиёт босқичлари бўйича маълумотлар асосида тайёрланган альбомлар, гуллар билан безатилган саҳна иштирокчиларнинг чиқишлари билан тадбирга янада файз, жозиба бағишлади.

Айниқса, ўзбекча Ассалому алайкум деган улуғ калом билан бошланган тадбирда ўқувчилар муомала маданияти, сўзларни тўғри талаффуз қилиш, ёндош тиллардан ўзлашган сўз ва ибораларнинг тилимиз тараққиётидаги ўрни, уларни тўғри қўллаш тўғрисида бир-бирлари билан фикр алмашдилар.

Шундан сўнг, ўқувчилар ўзбек халқ ашулаларининг оҳангларига мос ўзлари тайёрлаган рақсларни маҳорат билан ижро этишди. Ўзбекистон халқ артисти Озодбек Назарбеков ижросидаги “Доирангни чал”, “Хафа бўламан” ашулаларига жўр бўлиб куйладилар ва ашулалар мазмунини ўзлари ижро этган рақслар ҳаракатлари орқали ифода этиб бердилар. Бу билан ўқувчи-ёшлар она тилимизнинг дилрабо рақслар жилосидаги бетакрор маъноларини ўз ҳаракатлари орқали кўрсатиб, она тилимизнинг куй ва наволарга сингиб кетган буюк сеҳрини моҳирлик билан намойиш этишди.

Тадбир давомида ўқувчилар мактабнинг она тили ва адабиёт фани ўқитувчилари билан биргаликда буюк алломалар томонидан она тилимиз ҳақида билдирилган ҳикматлар хазинаси аро гўё саёҳат қилдилар, бири-биридан гўзал ва ибратли ҳикматлар хусусида фикрлашдилар.

Тадбирнинг адабий қисми янада қизиқарли таассуротларга бой бўлди. Унда ўқувчилар Ўзбекистон халқ ёзувчиси Ўткир Ҳошимовнинг “Дунёнинг ишлари” асаридаги “Қарз” ҳикояси асосида тайёрланган саҳна кўринишини маҳорат билан ижро этдилар.

Она тилимизнинг асрлар оша топталгани, минг хил чиғириқлардан майиб-мажруҳ ҳолда ўтиб, яна қаддини тутгани ва Она тилимизнинг қадр-қимматини ошириб яшаш ҳар биримизнинг муқаддас бурчимиз эканлиги хусусидаги Ўзбекистон халқ шоири Муҳаммад Юсуфнинг “Кечир мени она тилим” шеърини ўқувчилар жам бўлишиб ифодали ўқиб берганларида қалблар жунбушга келди ва томошабинлар ҳам она тилимизга бўлган юксак меҳр ва муҳаббатини олқишлар орқали намоён қилдилар.

“Она тилим жаранги олам узра таралгай!” мавзусидаги байрам тадбири ҳар бир қалбда она тилимизга чексиз меҳр-муҳаббат, жўшқинлик ва ифтихор туйғуларини янада мустаҳкамлади.

Робия ЙЎЛДОШЕВА