ЯНГИОБОДЛИКЛАРНИНГ ЯҚИН КЎМАКЧИСИГА АЙЛАНГАН ҲОКИМ ЁРДАМЧИСИ

Янгиобод маҳалласи туманимиз марказидаги энг катта маҳаллалардан бири ҳисобланади. Йўллари доим серқатнов бўлган ушбу маҳалла ҳудудида Амударё муҳандислик техникуми, мактаблар, мактабгача таълим ташкилоти ва бошқада ижтимоий соҳа объектлари, савдо дўконлари ва умумий овқатланиш шохобчалари жойлашган. Ҳозирги кунда маҳалладаги ҳоким ёрдамчиси Муроджон Қўчқоров томонидан ҳудудда салмоқли ишлар амалга оширилмоқда ва янада ривожлантирилиб, Янгиобод файзли гўшага айлантирилмоқда.

Муроджон лавозимга киришган кунидан бошлаб, ишни аввало ушбу маҳалла раиси, хотин-қизлар фаоли, ёшлар етакчиси вазифасида фаолият юритаётган ходимлар билан ҳамкорликда керакли режаларни белгилаб олишдан бошлади. Шундан кейин уйма-уй юрган ҳолда ҳудудда яшовчи ҳар бир оилани хатловдан ўтказиб, ишсиз аҳоли рўйхатини шакллантирди, мутасадди ташкилот ходимларини жалб этган ҳолда ҳудуддаги мавжуд бўш турган бинолар ва ерлар тўғрисидаги маълумотларга аниқлик киритиб, чуқур ўрганишлар ўтказди. Улардан оқилона фойдаланиш мақсадида туман ҳокимлиги мутасаддилари иштирокида ҳамда хусусий сектор раҳбарларининг истиқболли бизнес режаларига кўра ишсиз аҳолига танлов асосида олиб бериш ишларини йўлга қўйди.

Ўтказилган хатлов натижасида хонадонлар даромади кам, қўшимча даромад олиш истагидаги, доимий даромадга эга, ижтимоий ҳимояга муҳтож, боқувчисини йўқотган, ногиронлиги бор, иқтисодий аҳволи яхши, ўзига тўқ оилалар каби тоифаларга ажратиб олинди. Шунга асосан аҳоли даромадини ошириш борасида бир қатор амалий ишлар йўлга қўйилди.

Жумладан, маҳаллада оилавий тадбиркорликни ривожлантириш истагидаги фуқароларга кредит маблағлари ажратилишида кўмаклашилди. Айримларига деҳқончилик қилишлари учун ер майдонлари ажратилди. Ишсиз аёл-қизлар тикувчилик, қандолатчилик ва тадбиркорлик касбларига ўқитилди.

– Маҳалламизнинг асосий драйвери хизмат кўрсатиш ва савдо, қўшимча ўсиш нуқталари томорқа ерларига иссиқхона қуриш, паррандачилик ва чорвачилик бўлиб, ҳудудни ривожлантириш дастурини ана шу драйверлар асосида тузиб чиққанмиз, – дейди ҳоким ёрдамчиси Муроджон Қўчқоров. – Ҳозирги кунда Гулимбат Аҳмедов бошқараётган “Эрмонов Урозбой”, Мансур Яхшимов раислик қилаётган “Қуролбой Олломович”, Ширин Юсупова раҳбарлигидаги “Боғи Шамол” фермер хўжаликларига 10дан ортиқ оилалар бириктирилиб, иш билан банд қилинди. Айрим оилаларнинг хонадонларидаги томорқаларида иссиқхоналар ташкил этишига кўмаклашилиб, даромад топишларига имконият яратилди.

Муроджон 2004 йилда Қорақалпоқ давлат университетини тугатиб, иқтисодиётда ахборотлар тизими мутахассислигига эга бўлди. 2004-2006 йилларда “Ўзбекистон почтаси” акциядорлик жамияти Қорақалпоғистон филиали Манғит почта алоқа тармоғи кузатувчиси, 2007 йилдан 2022 йилгача Қорақалпоғистон Республикаси Ғазначилик бошқармасининг Амударё тумани бўйича ғазначилик бўлинмаси юридик мажбуриятлар ва баҳоларни рўйхатга олиш гуруҳи бош иқтисодчиси, шу гуруҳ раҳбари, ғазначилик операцияларни назорат қилиш бўйича бош мутахассиси, ғазначилик бўлинмаси бошлиғи ўринбосари, ғазначилик бўлинмаси бошлиғи вазифасини вақтинча бажарувчи, ғазначилик бўлинмаси бошлиғи каби лавозимларда фидойилик билан хизмат қилди.

Президентимиз ташаббуси билан маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолияти йўлга қўйилганидан кейин Муроджон 2022 йилдан Янгиобод маҳалласида ушбу лавозимда иш бошлади ва ўтган даврлар мобайнида оилалар аҳволини ўрганиб, тегишли тартибда чоралар кўрди, оилаларнинг иқтисодий аҳволи яхшиланишига ўз ҳиссасини қўшди. 

Ўтган 2023 йил давомида ҳам қатор ишлар амалга оширилди. Жумладан, 9 нафар фуқарога субсидия берилди, 81 нафар фуқарога 1 млрд. 038 млн. сўмлик кредитлар ажратилди, 112 нафар фуқаронинг ўз-ўзини банд қилишига кўмаклашилди. Шунингдек, 12 та юридик ва 8 та якка тартибдаги тадбиркорлик субъектлари давлат рўйхатидан ўтказилиб, 5 нафар тадбиркорга фаолиятларини кенгайтиришларига кўмаклашиш учун 213 млн. сўмлик кредитлар ажратилди.

– “Ёшлар дафтари”да рўйхатда турардим, – дейди шу маҳаллада яшовчи Гулноза Абдуллаева. – Яратилган имкониятлардан фойдаланиб, тикувчилик бўйича ўқув курсини тамомладим, лекин тикув машинам йўқ эди. Ҳоким ёрдамчисининг тавсияси билан субсидия асосида тикув машинаси ҳам берилди. Ҳозир ёш болам бўлгани сабабли уйда ўтирган ҳолда буюртмага қараб, ҳар хил турдаги кўйлакларни тикяпман. Бунинг учун маҳалламиз масъулларидан, Юртбошимиздан миннатдорман.

– Маҳалламизда ҳоким ёрдамчисининг кўмаги билан ўзини ўзи банд қилиб, даромад топаётганлар сони ортмоқда, – дейди Шаҳло Қодирова. – Мен ҳам жуда қизиққаним сабабли аёллар сартарошлиги бўйича ҳунар ўргандим ва ҳоким ёрдамчисининг кўмаги билан кредит олдим. Ушбу кредит маблағларига гўзаллик салонида фойдаланиладиган керакли асбоб-ускуналарни олдим. Ҳозирги кунда туманимиз марказида салон очиб, хотин-қизларга хизмат кўрсатяпман. Эътибор ва ғамхўрликдан жуда миннатдорман.

Маҳалла фуқароларидан Икром Эрназаров эса ҳоким ёрдамчиси кўмагида олган кредит маблағи ҳисобидан ўз хонадони томорқасидаги иссиқхонасини кенгайтирди ва янада кўпроқ даромад топа бошлади. Хусусий клиника ташкил этган Улуғбек Абдураҳмонов ҳам ҳоким ёрдамчиси кўмаги билан олинган кредит маблағларини тиббий жиҳозлар олишга сарфлади ва элга тиббий хизмат кўрсатишни йўлга қўйди. “Иброҳим думан кабоб” МЧЖ раҳбари Ғофуржон Эгамберганов кредит маблағларини умумий овқатланиш шохобчасини кенгайтиришга сарф қилди. Якка тадбиркор Оғабек Аҳмадов оилавий нодавлат мактабгача таълим муассасасини ташкил этди.

Маҳаллада масъуллар билан ҳамкорликда режалаштирган ҳолда Президентимизнинг 2023 йил 30 март кунги Қорақалпоғистон Республикасига ташрифидан сўнг берилган тегишли топшириққа кўра маҳаллаларга ажратиладиган 500 млн. сўм маблағларни ҳам мақсадли сарфлашга алоҳида эътибор қаратилди. Ушбу маблағлар ҳисобидан Абдулла Авлоний номидаги кўча аҳолисини кўпдан бери қийнаб келаётган электр таъминоти муаммоси ҳал этилиб, кўчага бетон симёғоч ва СИП кабель тортилди. Маҳалла ҳудудидаги 40-сонли мактабга борувчи пиёдалар йўлаги қурилди. Айни пайтда “Амударё” кўчасида жойлашган болалар майдончаси таъмирланмоқда.

Ҳоким ёрдамчиси Муроджон Қўчқоровнинг келгусида маҳалла иқтисодини ривожлантиришга доир режалари кўп. У маҳалла ҳудудидаги аҳолини узоқ йиллардан буён қийнаб келаётган бандлик масаласи, тадбиркорликни ривожлантириш ва шу орқали камбағалликни қисқартириш билан боғлиқ ижтимоий муаммоларга ечим топишга ҳаракат қилмоқда. Муроджоннинг барча саъй-ҳаракатлари, амалга ошираётган хайрли ишлари одамларни даромадли қилиш, бандлигини таъминлашга хизмат қилаётгани билан аҳамиятлидир. 

Озода Худойберганова.