Oʻzbekiston Respublikasi davlat mustaqilligining yigirma uch yillik bayramiga tayyorgarlik koʻrish va uni oʻtkazish toʻgʻrisida
Oʻzbekiston Respublikasi Prezidentining qarori
Shu
kunlarda xalqimiz Vatanimizning shonli tarixidagi buyuk va oʻchmas sanani –
Oʻzbekiston mustaqilligining 23 yilligini keng nishonlash uchun katta
tayyorgarlik koʻrmoqda. Ana shu ulugʻ ayyomni munosib kutib olish va oʻtkazish
maqsadida bugungi kunda olib borayotgan maʼnaviy-maʼrifiy faoliyatimizning
asosiy maʼno-mazmunini avvalo biz tanlagan taraqqiyot yoʻlining har
tomonlama toʻgʻri va hayotiy yoʻl ekanini, yangi demokratik davlat va
fuqarolik jamiyati qurish borasida biz erishgan yutuq va marralarning
mohiyati va ahamiyatini yurtimiz aholisi va jahon jamoatchiligiga yetkazish,
ularning qadr-qimmatini chuqur anglash tashkil etishi darkor.
Shular
qatorida Oʻzbekistonimiz barqaror surʼatlar bilan oʻsib borayotgani, qoʻlga
kiritgan ulkan natijalarimizni butun dunyo tan olayotgani,
mamlakatimizning xalqaro maydonda obroʻ-eʼtibori ortib, oʻziga munosib
oʻrin egallab olayotganini keng yoritish, bu yutuqlarning asosiy omili va
mezonini birinchi navbatda xalqimizning dunyoqarashi, odamlarimizning
siyosiy ongi va tafakkuri oʻzgarib, fuqarolik faolligi tobora kuchayib
borayotganida koʻrish, ushbu ijtimoiy-siyosiy jarayonlarni har tomonlama
asoslab berish va bir-biri bilan uzviy bogʻliq holda tahlil qilish oʻta
muhim ahamiyatga ega ekanini taʼkidlash zarur.
Shu munosabat bilan:
1.
Oʻzbekiston Respublikasi davlat mustaqilligining yigirma uch yillik
bayramiga tayyorgarlik koʻrish va uni oʻtkazish boʻyicha Respublika
komissiyasining tarkibi ilovaga muvofiq tasdiqlansin.
Respublika
komissiyasi bir hafta muddatda "Yagonasan, muqaddas Vatanim, sevgi va
sadoqatim senga baxshida, goʻzal Oʻzbekistonim!” degan ezgu gʻoyani oʻzida
mujassam etgan tashkiliy-amaliy, madaniy-maʼnaviy hamda targʻibot-tashviqot
ishlari dasturini ishlab chiqsin.
2. Qoraqalpogʻiston Respublikasi
Vazirlar Kengashi, Toshkent shahar va viloyatlar hokimliklariga,
Xotin-qizlar qoʻmitasi, "Kamolot” yoshlar ijtimoiy harakati, "Nuroniy” va
"Mahalla” jamgʻarmalariga Mustaqillik bayramining yigirma uch yilligini
yuksak saviyada nishonlash uchun joylarda hududiy komissiyalar tuzish,
Respublika dasturidan oʻrin oladigan tadbirlar rejasini ishlab chiqish
topshirilsin.
3. Mazkur dasturni tuzishda quyidagi ustuvor yoʻnalishlarga alohida eʼtibor qaratilsin:
tarixan
qisqa davrda biz qanday ulkan rivojlanish yoʻlini bosib oʻtganimizni
baholashda "Kim edigu kim boʻldik?” degan hayotiy haqiqatni asosiy va bosh
gʻoya sifatida belgilash;
mamlakatimizning oʻtgan asr oxirida keskin
ijtimoiy muammolar girdobiga tushib qolgan, aholining hayot darajasi
boʻyicha sobiq SSSRda eng oxirgi oʻrinlardan birini egallagan, paxta
yakkahokimligi halokatli tus olgan, iqtisodiyoti biryoqlama rivojlangan,
qoloq agrar respublikadan bugungi kunda sanoati tez surʼatlar bilan
oʻsib, iqtisodiy qudrati va salohiyati yuksalib borayotgan zamonaviy
davlatga aylanganini ochib berish. Buning tasdigʻini mustaqillik yillarida
Oʻzbekiston iqtisodiyoti 4,1 barobar, aholining yalpi real daromadlari jon
boshiga 8,2 karra oshgani, keyingi 9-yil davomida mamlakatimizda yalpi ichki
mahsulotning oʻsish surʼati 8 foizdan kam boʻlmasdan kelayotgani va boshqa
shu kabi raqam va koʻrsatkichlar misolida qiyosiy tahlillar orqali koʻrsatish;
yurtimiz, shahar va qishloqlarimiz qiyofasi yildan-yilga ochilib,
tobora obod va goʻzal boʻlib borayotgani, jumladan, aholimizning asosiy
qismi yashaydigan qishloq joylarda munosib turmush sharoitini yaratish,
namunaviy loyihalar asosida uy-joylar va infratuzilma tarmoqlarini barpo
etish boʻyicha amalga oshirilayotgan dasturlarning ijtimoiy ahamiyatini
yoritish;
hech shubhasiz, vaqt oʻtishi bilan tobora yorqin namoyon
boʻlayotgan, biz birinchilar qatorida amalga oshirgan va davom ettirayotgan,
dunyoda katta qiziqish uygʻotayotgan Kadrlar tayyorlash milliy dasturi va
Maktab taʼlimini rivojlantirish umummilliy dasturi, bir soʻz bilan
aytganda, taʼlim-tarbiya sohasiga eng ustuvor ahamiyat berganimiz
mamlakatimizning katta surʼatlar bilan barqaror rivoj topishida va
yurtimizning dadil qadamlar bilan ilgarilab borishida mustahkam fundament
yaratib berganiga alohida eʼtibor qaratish;
biz uchun oʻta muhim
boʻlgan sogʻliqni saqlash, ilm-fan, madaniyat va sanʼat, sport sohalarida
qoʻlga kiritgan yutuq va marralarimizning hayotiy omillarini ochib berish;
mustaqillikning
birinchi yillaridan boshlab xotin-qizlarga doimiy eʼtibor va gʻamxoʻrlik
koʻrsatish, ularning huquq va manfaatlarini taʼminlash, oila va jamiyat
hayotidagi nufuzini oshirish, qobiliyat va isteʼdodini roʻyobga chiqarish,
onalik va bolalikni himoya qilish, ayniqsa, qiz bolalarni zamonaviy bilim
va kasb-hunarlarni egallab, hayotda munosib oʻrin olishi uchun amalga
oshirayotgan keng koʻlamli ishlarimizni hayotiy va taʼsirchan misollarda ifoda
etish;
bugun biz boshimizdan kechirayotgan oʻta tahlikali va qaltis
zamonda, yon-atrofimizda turli xavf-xatarlar kuchayib borayotgan bir
sharoitda eng katta va bebaho boyligimiz boʻlgan tinchlik-osoyishtalikni koʻz
qorachigʻidek saqlash, millatlar va fuqarolar oʻrtasidagi doʻstlik va
hamjihatlik, oʻzaro hurmat va mehr-oqibat muhitini yanada mustahkamlash,
doimo hushyor va ogoh boʻlib, tinchlik uchun kurashib yashash hal qiluvchi
ahamiyatga ega ekanini chuqur aks ettirish;
Oʻzbekistonning xalqaro
maydonda olib borayotgan, yaqin va uzoq qoʻshnilarimiz bilan doʻstona
aloqalar, oʻzaro hamkorlik munosabatlarini rivojlantirishga qaratilgan
tashqi siyosatini, dunyoning turli mintaqalarida yuz berayotgan
qarama-qarshilik va toʻqnashuvlarni faqatgina siyosiy muzokaralar, tinchlik
yoʻli bilan hal etish boʻyicha yondashuv va qarashlarining mazmun-mohiyatini
keng jamoatchilikka yetkazish;
yuqorida bayon etilgan beqiyos
natijalar, Vatanimizning izchil va barqaror taraqqiyoti negizida turgan
asosiy omil va mezonlarni ochib berish amalga oshiriladigan barcha
axborot-informatsion ishlarimizda, maʼnaviy-maʼrifiy uchrashuv va
muloqotlarda, jonli suhbatlarda katta oʻrin tutishi lozim. Ushbu qarorning
kirish qismida qayd etilgan fikr va gʻoyalarni chuqur maʼnoli, shu bilan
birga, sodda tilda yoritish, odamlarning qalbi va ongiga singdirish bu
borada alohida ahamiyat kasb etishi tabiiydir.
Muxtasar aytganda,
biz mustaqillik yillarida qanday ogʻir va mashaqqatli sinovlardan oʻtib,
misli koʻrilmagan yutuqlarga erishgan boʻlsak, ularning barchasi zamirida
faqatgina xalqimizning fidoyi mehnati, chidamliligi, olijanobligi va
bagʻrikengligi, matonati va jasorati, ertangi kunga mustahkam ishonchi
mujassam ekanini teran aks ettirish zarur.
4. Respublika
Maʼnaviyat va maʼrifat kengashi tomonidan Qoraqalpogʻiston Respublikasi,
viloyatlar hamda Toshkent shahrida Mustaqillik bayramiga bagʻishlab aholining
keng qatlamlari oʻrtasida maʼrifiy uchrashuvlar, jonli muloqot va
suhbatlar, adabiy-badiiy kechalar, madaniy tadbirlar oʻtkazish maqsadida
taniqli olimlar, adiblar va sanʼatkorlardan iborat maʼnaviy-maʼrifiy
targʻibot guruhlari tashkil etilsin hamda ularning aniq reja asosida
faoliyat olib borishi taʼminlansin.
5. Respublika komissiyasi oʻz
yigʻilishlarida belgilangan chora-tadbirlar markazda va joylarda qanday
amalga oshirilayotgani yuzasidan har bir hudud, vazirlik va idora
rahbarlari hisobotini muntazam ravishda eshitib borsin.
6. Toshkent
shahrida, Qoraqalpogʻiston Respublikasi va viloyatlarda oʻtkaziladigan
bayram dasturlarini tayyorlashga ommaviy tomoshalar boʻyicha yuksak mahorat va
tajribaga ega boʻlgan mutaxassislar – stsenarist va rejissyorlar, yozuvchi
va shoirlar, kompozitor va baletmeysterlar, sahna rassomlari, isteʼdodli
yosh sanʼatkorlar vakillaridan iborat ijodiy guruhlar keng jalb etilsin.
7.
Madaniyat va sport ishlari vazirligi "Oʻzbeknavo” estrada birlashmasi
Yozuvchilar va Bastakorlar uyushmalari bilan birgalikda yurtimiz istiqlolini
tarannum etishga qaratilgan eng yaxshi qoʻshiqlar, musiqa asarlari uchun
"Yagonasan, muqaddas Vatan!” anʼanaviy respublika tanlovining yakuniy
bosqichini oʻtkazsin. Tanlov gʻoliblari va sovrindorlari Mustaqillik
bayrami arafasida eʼlon qilinsin.
8. Oʻzbekiston Matbuot va
axborot agentligi, Madaniyat va sport ishlari vazirligi Oʻzbekiston
Yozuvchilar uyushmasi, Oʻzbekiston Jurnalistlari ijodiy uyushmasi, Badiiy
akademiya, "Tasviriy oyina” uyushmasi va boshqa tegishli tashkilotlar bilan
birgalikda avgust oyining oxirida "Eng ulugʻ, eng aziz”, "Vatan uchun
yashaylik”, "Seni kuylaymiz, zamondosh”, "Ranglar jilosida – ona diyor” kabi
koʻrik-tanlovlarni yuqori darajada oʻtkazishni taʼminlasin.
9. Belgilab qoʻyilsinki, oʻtkaziladigan bayram tadbirlari:
Qoraqalpogʻiston Respublikasi va viloyatlarda mahalliy byudjetlar hamda xayriya mablagʻlari hisobidan;
Toshkent shahrida respublika byudjeti va Toshkent shahar mahalliy byudjeti mablagʻlari hisobidan teng ulushlarda qoplanadi.
10.
Oʻzbekiston Matbuot va axborot agentligi, Oʻzbekiston Milliy
teleradiokompaniyasi, Oʻzbekiston Milliy axborot agentligi, "Jahon”
axborot agentligi va boshqa ommaviy axborot vositalariga mustaqillikning
yigirma uch yillik bayramiga tayyorgarlik koʻrish va uni oʻtkazish boʻyicha
amalga oshirilayotgan ishlarni atroflicha yoritib borish tavsiya etilsin.
11. Mazkur qarorning ijrosini taʼminlash Oʻzbekiston Respublikasi Bosh vaziri Sh.Mirziyoyev zimmasiga yuklansin.
Oʻzbekiston Respublikasi
Prezidenti I.Karimov
Toshkent shahri,
2014-yil 1-iyul
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
