КИТОБХОНЛИК ОЙЛИГИ муваффақиятли якунланди

Жорий йилнинг 20 апрелидан 20 майигача “Тараққиёт кўзгуси” газетаси таҳририяти ва “Жайхун илҳомлари” ННТ ҳамкорлигида туманимиз бўйлаб “Оммавий китобхонлик ойлиги” ўтказилди. Бир ой давом этган мазкур тадбирда туманимизнинг энг чекка ҳудудлари ҳам қамраб олиниб, унда 1000 дан ортиқ ўқувчи-ёшлар ва уларнинг ота-оналари катта қизиқиш ва иштиёқ билан иштирок этдилар. Оммавий китобхонлик ойлигида “Сайёр китоб карвони” лойиҳаси муваффақиятли амалга оширилди. Дўрман овулидаги 20-сонли мактабдан бошланган лойиҳа доирасидаги тадбирлар 15-, 44-, 9-, 32-, 41-, 22-сонли мактабларда, шунингдек, Қипчоқ овулидаги Амударё агробизнес касб-ҳунар коллежи ҳамда Амударё академик лицейининг ёш китобхонлари даврасида ниҳоятда жўшқинлик билан давом этди.

Туманимизнинг Дўрман, Қипчоқ, “Оқ олтин”, Куюк кўпир овулларидаги ўқув муассасаларида ўтказилган “Сайёр китоб карвони” лойиҳаси доирасидаги “Кўчма кутубхона”, “Кўчма китоб дўкони” юзлаб китобхонларни жалб этган бўлса, “Энг яхши совға – китоб”, “Кутубхонага китоб совға қиламан” акцияларида ёшлар ва уларнинг ота-оналари фаоллик билан иштирок этдилар.

Ойликнинг учинчи ўн кунлиги янада қувончли лаҳзаларга бой бўлди. 14 май куни Куюк кўпир овулида Амударё телевидениеси, “Тараққиёт кўзгуси” газетаси таҳририяти ва “Жайхун илҳомлари” ННТ ҳамкорлигида 1000 га яқин китоб фондига эга кутубхона ташкил этилди.

40-сонли мактабда эса ўқувчи-ёшлар билан ижодкорларнинг учрашуви ташкил этилиб, шеърхонлик, адабий-бадиий мавзудаги суҳбатларда Беруний туманида истиқомат қилувчи тарихчи-ижодкор, шоир ва публицист Қурбон Шониёзов иштирок этди.

Оммавий китобхонлик ойлиги 19 май куни туманимизнинг китобхон ёшлари иштирокида Амударё академик лицейида ўтказилган адабий-мусиқий учрашув билан якунланди.

“Китоб – маънавият чашмаси” номли тадбирни иқтидорли суҳандон Ойбек Бегимов ва унинг шогирди Шоҳиста Раҳимбоевалар маҳорат билан бошқарди.

Учрашувга ташриф буюрган, халқимиз севган машҳур шоирлар Ўзбекистон Республикасида хизмат кўрсатган маданият ходими, 500 дан ортиқ шеърлари қўшиққа айланган хоразмлик оташнафас шоир Ошиқ Эркин (Мадраҳимов), Ўзбекистонда хизмат кўрсатган журналист, Қорақалпоғистон халқ шоири Халилла Давлатназаров, ёш иқтидорли шоир Алишер Дарвеш (Собиров), туманимизда яшаб ижод этаётган устоз шоирлардан Турсунбой Абдуллаев, “Жайхун илҳомлари” ННТ раиси, шоир Аҳмад Нафасовлар ўз ижод намуналарини китобхон ёшлар билан баҳам кўрдилар.

Тадбирда туман Маданият бўлимининг хушовоз хонандалари Муроджон Ибрагимов, Ваҳобжон Абдуллаевлар ошиқ Эркин ва Халилла Давлатназаров қаламига мансуб шеърлар билан айтиладиган ашулаларни ижро этишди. 9-сонли Болалар мусиқа ва санъат мактаби ўқувчи-ёшлари ижросидаги мусиқий оҳанглар учрашувга янада файз бағишлади.

Учрашув тадбирида китобхон ёшлар учун викторина саволлари ҳам берилди. Викторина саволларига тўғри ва аниқ жавоб берган иштирокчиларга тадбир ташкилотчилари томонидан китоблар совға қилинди.

Тадбир доирасида “Жайхун илҳомлари” ННТ ва “Тараққиёт кўзгуси” газетаси маънавий муҳаррирлик қилган ёш ижодкорлар — 22-сонли мактаб ўқувчиси Умида Ердошеванинг “Ўзлигингдан айланай, ўлкам”, 36-сонли мактаб ўқувчиси Ирода Ердошеванинг “Меҳр чашмаси”, Жаҳон иқтисодиёти ва дипломатия университети қошидаги академик лицей ўқувчиси Қундузой Юсупованинг “Куртак” ҳамда ёш ҳунарманд қиз Азиза Мадраҳимованинг “Баҳордан дарак” деб номланган китоблари тақдимоти ўтказилди.

Тақдимотда журналист Робия Йўлдошева ёш ижодкорларнинг китоблари ва улар қаламга олган ранг-баранг мавзулар ҳақида, шунингдек, шоира қизларнинг интилиш ва орзулари хусусида батафсил маълумот берди.

Бўлиб ўтган мазкур адабий-мусиқий учрашув тадбири туманимиз ёшлари учун ҳақиқий мутолаа байрамига айланиб кетди ва ёш китобхонлар қалбига олам-олам завқ бағишлади.

Робия Йўлдошева.