ЙИГИРМА ЙИЛДАН КЕЙИНГИ ДИЙДОР
Жорий йилнинг 5 июль куни Амударё туманидаги 10-сонли умумий ўрта мактабни 2001 йилда тугатган собиқ битирувчиларнинг 20 йиллик юбилей учрашуви бўлиб ўтди. Ушбу даргоҳни йигирма йил муқаддам тамомлаган собиқ ўқувчилар дийдорлашуви мактаб биносида ташкил этилди. Учрашувга Республикамизда телекоммуникация соҳасида, Олий таълим муассасаларида, ҳарбий соҳада, хусусий тадбиркорликда, педагогикада, ишлаб чиқаришда фаол меҳнат қилиб келаётган 60 дан зиёд битирувчилар келишди. Учрашувга келган битирувчилар Республикамизда ўзларининг фаол хизматлари, улкан тажрибалари билан танилган етук мутахассислар бўлиб, Ватанимиз равнақи учун ҳисса қўшаётган, ҳозирги кунда ўзининг бой амалий тажрибаси билан ёшларга ўрнак бўлаётсан азиз инсонлардир.
Учрашувда мактабнинг 60 дан зиёд собиқ ўқувчилари ҳамда уларнинг устоз-мураббийлари, мактабнинг собиқ директори Жумабой Матўразов, собиқ ўқитувчилардан Ҳайитгул Абдуллаева, Рустам Бозорбоев, Махсуд Ҳайтбоев, Кенжабой Бозорбоев ва мактаб директори Омон Шеримбетов қатнашдилар.
Мактаб ўқувчилари томонидан ташкил этилган узоқ йиллик синфдошлар учрашуви байрам тантаналарига айланиб кетди. Тадбирнинг ташкилий қисми мактаб биносида ўтказилди. Собиқ ўқувчилар томонидан мактаб кутубхонасига китоблар жамланмаси совға қилинди.
Тадбирда ёши улуғ устозлар, фахрий ўқитувчилар сўзга чиқиб, собиқ ўқувчиларни 20 йиллик учрашув билан муборакбод этдилар. Уларга мактаб ҳаёти, ўқувчилик йилларига доир қизиқарли маълумотлар, ҳаётнинг тотли онлари хусусида илиқ фикрларини баён этдилар. Собиқ синфдошлар ҳам олтин ёшликнинг унутилмас лаҳзалари, қадр-қиммат, устозларга эъзозлар ҳақида дил изҳорларини баён этдилар.
Замонавий жиҳозланган хоналарда илм олаётган бугунги кун ўқувчисига ҳавас билан қарашар экан, бугун юртимизда илм-фан ва технологияларнинг бугунги глобал дунёда жадал ўсиши, ёшларга кенг имкониятлар яратилиб, уларнинг истеъдоди ва қобилятларини тўлиқ амалга оширишга алоҳида эътибор қаратилганлигини таъкидлаб ўтдилар.
Болалик даврининг олтинга тенг дамлари ўтган синфхоналарда фахрий ўқувчилар беғубор дамлар завқини қўмсаб, ушбу кун болаликнинг рангин дунёсига саёҳат қилишди.
Синф парталарида ўтирар экан, мактаб даврида кечган қизиқарли воқеалар, ажойиб саргузаштларни мириқиб эслашди. Учрашувга келган битирувчилар мактабнинг ҳозирги ҳаёти, илм-фандаги ютуқлари, янги техника технологиялар билан танишдилар ва ўзларининг таассуротлари, болалик хотиралари билан ўртоқлашдилар. Бундан 20 йил олдин мактабни тугатган собиқ ўқувчилар таълим маскани олдида эсдалик фотосуратларига тушдилар ва устозларга таъзим бажо келтириб, мактаб раҳбариятига устоз-мураббийларига улкан зафарлар ва муваффақиятлар, яхши ниятлар ва истаклар билдиришди.
Сўнгра учрашув Манғит шаҳридаги “Нур” тўйхонасида давом эттирилди.
Синфдошлари ўртасидаги дўстлик туйғуси инсонни маънавий қўллаб- қувватловчи, унинг оғирини энгил қилувчи, руҳиятини кўтарувчи, ўзига ишонч орттирувчи куч ҳисобланади. Инсонда дўстлик, биродарлик, ўзаро ишонч туйғулари дарҳол юзага келиб, ўз-ўзидан мустаҳкамланиб қолмайди.
Синфдошлар ўртасидаги дўстлик туйғуси йиллар давомида сайқалланиб келади. Мактаб давриданоқ бир-бири билан ёр-биродар бўлиб қолган дўстлар бугун бир дастурхон атрофида, ширин хотираларни, беғубор дамларни эсладилар.
Шундан кейин ташкилотчилар узоқ ва яқиндан келган битирувчиларни бир пиёла чойга таклиф қилдилар, дўстлар учун ёзилган дастурхон атрофида дўстона суҳбат ва ўйин-кулгилар билан битирувчилар тантанаси узоқ вақт давом этди.
Синфдошларнинг соғинчли дийдорлашуви узоқ йиллар хотирада муҳрланиб қоладиган даражада юқори савияда ўтказилди.
Учрашув жараёнида собиқ битирувчиларнинг дил сўзлари бир-бирига уланиб кетди, шўх-шодон ўйин-кулгулар авж олиб, куй-қўшиқлар яйради.
Севара ИСМОИЛОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
