ПРЕЗИДЕНТ ЭЪТИБОРИ ВА ЭЪТИРОФИДАН МАМНУНМИЗ
Мамлакатимизда кекса авлод вакилларига кўрсатилаётган эътибор ва рағбат, уларнинг кўнгилли дам олишлари, ҳар бир кунини осуда, тинч ва хотиржамликда ўтказишлари учун яратиб берилаётган шарт-шароитларни, тўғриси, умрим бино бўлиб кўрмаганман. Нафақат ёшлигимизда, балки 50-60 ёшга кирганимизда ҳам бир шиор бўларди: “7 ёшдан 70 ёшгача ҳамма далага!” – деган. Далада нима қилардик?
Пахта икки қулоқ бўлиб униб чиққанидан то кеч кузгача “кўнгилли ҳашарчи” бўлар эдик-да! Фарзандлари, неваралари билан ана шу даладан бери келмаган ўша 50-60-70 ёшли кексаларнинг кўпи бугун орамизда йўқ. Қийинчиликларни кўравериб, елкалари яғир бўлган бу инсонларнинг айримлари айни пайтда улуғ ёшга етишган. Аллоҳга минг-минг шукурки, бугунги кексалар давлатимизнинг меҳр-ардоғида. Албатта, бу каби эътибор ва аъзозга сазовор нуронийларимиз ҳаёт қийинчиликларини куч-қувватлари, ёшлик шижоати тинимсиз меҳнатлари, сабр-матонатлари билан енгиб, мамлакатимиз мустақиллигини мустаҳкамлашга муносиб ҳиссаларини қўшдилар.
Куни кеча муҳтарам Президентимиз “Янги Ўзбекистон” газетасига берган интервьюларида бу ҳақда алоҳида тўхталиб: “Нуронийлар ўзлари қийналиб бўлса ҳам бизни шундай тинч ва дориломон кунларга етказганлари – бу ҳеч нарса билан ўлчаб, баҳолаб бўлмайдиган улкан жасорат ва қаҳрамонликдир”, - дея алоҳида эътироф этганлари қалбимизга қувонч бағишлади. Ахир ўзингни аямай тун-у кун меҳнат қилсанг-у, сенга маънавий раҳбат бўлмаса, бундан ёмони йўқ.
Президентимиз биз нуронийларга турли кўринишларда ғамхўрлик ва маънавий рағбат кўрсатиш билан бирга, Янги Ўзбекистон ёшларини тарбиялашда нуронийларнинг янада фаол иштирок этишлари учун қўшимча имкониятлар яратиш, халқимизни рози қилиш энг улуғ мақсад эканлигини қайта-қайта таъкидладилар. Президентимизнинг бу фикрлари бизни халқимиз билан бир сафда, бир мақсад йўлида бирлашган ҳолда Янги Ўзбекистонни барпо этишдек фаоллик кўрсатишга ундайверади.
Бекман Аллаберганов, нуронийлар фаоли
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
