“КЕКСАЛАР ҲАФТАЛИГИ” ДОИРАСИДА СПОРТ МУСОБАҚАЛАРИ ЎТКАЗИЛДИ

Амударё туманида “Кексалар ҳафталиги” доирасида 8 октябрь куни туман Маҳалла ва оилани қўллаб-қувватлаш бўлими, туман Туризм ва спорт бўлими, туман “Маҳалла” ҳайрия жамоат фонди, Миллий гвардия ҳузуридаги қўриқлаш бўлими билан ҳамкорликда туман миқёсида спорт тадбирлари ташкил этилди. Тадбирда шахмат-шашка бўйича кексалар ўртасида, “Ақл чархи” турнири, “Кексалар завқи” спорт мусобақалари доирасида спортнинг шахмат, шашка, мини-футбол, стол тенниси ва бошқа турлари бўйича мусобақалар, “Саломатлик сари 5000 қадам” шиори остида пиёда юриш тадбирлари ташкил қилинди. Тадбирда тумандаги 100 дан зиёд нуронийлар, фахрийлар ва кекса авлод вакиллари фаол иштирок этдилар.

Амударё туман Нуронийлар жамоатчилик Кенгаши раиси ўринбосари Бекман Аллаберганов тадбирни очиб берди ва кекса авлод вакилларининг жамиятдаги ўрни ғоят муҳимлигини ва ҳаётий тажрибалари ёшларга ўрнак бўлишини таъкидлаб ўтди. Туман Маҳалла ва оилани қўллаб-қувватлаш бўлими бошлиғи ўринбосари Баҳодир Болтабоев кексалик гаштини сураётган отахон ва онахонларга “Кексалар ҳафталиги” доирасида амалга оширилаётган ишлар тўғрисида ва бундай тадбирлар кўплаб ташкил қилинишини, албатта, бунда нуронийларнинг иштироки муҳимлигини  алоҳида қайд этди. Туризм ва спорт бўлими бошлиғи Ғуломжон Қурбонбоев эса тадбир давомида бўлиб ўтадиган спорт турлари ва тартиби билан таништириб, иштирокчиларга бугунги мусобақаларда омад тилади.

Мусобақалар Нукус Давлат Педагогика Институти ҳузуридаги иқтидорли болалар мактабида бўлиб ўтди, иштирокчилар “Саломатлик сари 5000 қадам” шиори остида мусобақалар ўтказиладиган иншоотга олиб борувчи йўлни пиёда босиб ўтдилар.

Тадбир янгича услубда, яъни, Street workout - турникда тортилиш ва машқлар бажариш бўйича мусобақа билан бошланди. Мусобақада 3-ўринни Қизилчоли маҳалласидан Жумабой Матвафоев, 2-ўринни Ойбек маҳалласидан Ялғаш Матмуратов, фахрли 1-ўринни Қизилчоли маҳалласидан Ибрагим Юсуповлар эгаллашди.

Спорт тадбирлари давомида иштирокчиларнинг фаоллигини ошириш мақсадида мини-футбол майдончасида чигалёзди машқлари ҳам бажарилди.

Шундан сўнг, шахмат-шашка, стол тенниси мусобақаларига старт берилди. Стол тенниси мусобақаларида 3-ўринни Дўстлик маҳалласидан Озод Шомуродов, 2-ўринни Олмазор маҳалласидан Мамбатсолий Абдуллаев, фахрли 1-ўринни Олмазор маҳалласидан Баходир Бозорбоевлар эгаллашди.

Тадбир давомида, стол тенниси ва Street workout мусобақалари ғолибларига туман Нуронийлар жамоатчилик Кенгаши раиси ўринбосари Бекман Аллаберганов ҳамда туман Маҳалла ва оилани қўллаб-қувватлаш бўлими бошлиғи ўринбосари Баҳодир Болтабоев, туман Туризм ва спорт бўлими бошлиғи Ғуломжон Қурбонбоевлар томонидан Маҳалла ҳайрия жамоат фонди ҳомийлигида эсдалик совғалари тақдим қилинди.

“Кексалар завқи” спорт мусобақалари доирасидаги шахмат-шашка мусобақалари муросасиз кечди. Шашка бўйича мусобақада 18 нафар иштирокчи қатнашиб, унда 3-ўринни Дўстлик маҳалласидан Қурбонбой Юсупов, 2-ўринни Бўстон маҳалласидан Рахимбой Жуманиёзов, фахрли 1-ўринни Ўзбекистон маҳалласидан Шомурод Ибодуллаевлар эгаллашди. Мусобақа якунида туман Маҳалла ва оилани қўллаб-қувватлаш бўлими бошлиғи ўринбосари Баҳодир Болтабоев ғолибларга эсдалик совғалари топширди.

Шахмат мусобақалари янада қизиқарли таассуротларга бой бўлди. Унда махсус беллашувларда 1-ўринни Дўстлик маҳалласидан Бекчон Раҳимов, Амир Темур номли овулдан Ибрагим Султоновлар эгаллашди. Асосий ўйинларда эса 3-ўринни Ўзбекистон маҳалласидан Айимбат Камолов, 2-ўринни Қизилчоли маҳалласидан Чоршам Матвафоев, фахрли 1-ўринни Қизилчоли маҳалласидан Мамбатсолий Матякубовлар эгаллашди. Ғолибларга Маҳалла ҳайрия жамоат фонди ҳомийлигида эсдалик совғалари тақдим қилинди.

Тадбир давомида Нукус Давлат Педагогика Институти ҳузуридаги иқтидорли болалар мактаби директори Отабек Йўлдашев нуроний онахон ва отахонларни “Кексалар ҳафталиги” муносабати билан муборакбод қилиб, уларнинг жамиятда, айниқса, ёшлар тарбиясида ўрни беқиёслиги, ўзларининг ҳаётий тажрибалари орқали ёшларга ўрнак бўлиши, бу борада ёшлар нуронийларга суянишини таъкидлаб ўтди ва иштирокчиларни иқтидорли болалар мактабида яратилган шарт-шароитлар билан яқиндан таништирди.

Тадбир қатнашчилари бўлган нуронийлар давлатимиз томонидан ўзларига кўрсатилаётган ҳурмат ва эътибордан мамнунликларини билдирдилар ва албатта бундай тадбирлар янада кўплаб ташкил қилиниши лозимлигини эътироф этдилар. Шу билан бирга тадбир ташкилотчиларига чин дилдан миннатдорчлик билдирдилар.

Баҳодир БОЛТАБОЕВ, туман Маҳалла ва оилани қўллаб-қувватлаш бўлими бошлиғи ўринбосари.