НОГИРОНЛАР ЖАМИЯТИ АМУДАРЁ ТУМАН БЎЛИНМАСИ ГРАНТ ТАНЛОВИ ҒОЛИБИ БЎЛДИ
Ўзбекистон Республикаси Ногиронлар жамияти Амударё туман бўлинмаси томонидан имконияти чекланган фуқароларни ижтимоий-маънавий қўллаб-қувватлаш, уларнинг ўз имкониятлари даражасида касб-ҳунар ўрганишлари, интилувчан, билимга чанқоқ, ногиронлиги бўлан ёшларнинг ўз билимларини ошириш, дунёқарашларини кенгайтиришлари учун зарур шарт-шароитлар яратишга алоҳида эътибор қаратилмоқда. Бу борадаги ишларни тўсиқсиз амалга ошириш мақсадида Ногиронлар жамияти туман бўлинмаси Ўзбекистон Республикаси Олий Мажлиси ҳузуридаги нодавлат-нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди томонидан эълон қилиниб келинаётган танловларда иштирок этиб, бир неча марта танлов ғолиби бўлганлиги туфайли бўлинма аъзоларининг касб-ҳунарли бўлишлари, айрим имконияти чекланган ёшларнинг олий таълим муассасаларига ўқишга киришлари учун шароит яратилди. Ёшлар касбга ўргатилиб, умумтаълим фанлари бўйича билимларини мустаҳкамладилар, компьютер технологиялари бўйича кўникмаларга эга бўлдилар.
Ўтган 2021 йилнинг декабрь ойида Ўзбекистон нодавлат нотижорат ташкилотлари миллий ассоциацияси ва Ўзбекистон нодавлат нотижорат ташкилотларини қўллаб-қувватлаш жамоат фонди томонидан эълон қилинган “Янги Ренессанс интирокчилари” грант танловида “Жисмоний имконияти чекланган ўсмирлар ва ёшларни интеллектуал меҳнат фаолиятига жалб қилиш” йўналиши бўйича ўз лойиҳаси билан иштирок этган Ўзбекистон Республикаси Ногиронлар жамияти Амударё туман бўлинмаси ғолибликни қўлга киритди.
Жорий йилнинг 21 январь санасида Амударё муҳандислик техникуми биносида бўлинма танловда қўлга киритган мазкур ютуқ бўйича тақдимот маросими бўлиб ўтди.
Тақдимот маросимида Ўзбекистон Республикаси Диний ишлар бўйича Қўмитанинг Амударё туман бўйича мутахассиси Музаффар Шеримбетов, Ўзбекистон Ёшлар иттифоқи Амударё туман Кенгаши раиси Сардор Исмоилов, Амударё муҳандислик техникуми директорининг ўринбосари Шуҳрат Матирзаевлар иштирок этишиб, Ўзбекистон Республикаси Ногиронлар жамияти Амударё туман бўлинмаси раиси Нилуфар Холбоевани мамлакат миқёсидаги нуфузли танловда муваффақиятли иштирок этиб, юқори натижага эришгани ва ғолиб бўлганликлари билан табрикладилар.
Ўз навбатида бўлинма раиси Нилуфар Холбоева туманимизнинг турли ҳудудларида истиқомат қилувчи имконияти чекланган иқтидорли ўсмирлар ва ёшларнинг ўз иқтидорларини намоён этишлари учун уларни интеллектуал меҳнат фаолиятига жалб этиш борасида лойиҳада амалга ошириш кўзда тутилган вазифалар ҳамда лойиҳани бажаришдан кутилаётган натижалар ҳақида батафсил тўхталди.
Шунингдек, тақдимот маросимида сўзга чиққанлар лойиҳанинг имконияти чекланган ўсмирлар ва ёшларни ҳар томонлама қўллаб-қувватлашдаги аҳамияти хусусида сўз юритдилар.
Айтиш жоизки, “Ногиронлиги бўлган шахсларнинг ҳуқуқлари тўғрисида”ги Ўзбекистон Республикасининг қонунида ногиронлиги бўлган шахсларнинг жамоат бирлашмалари ушбу тоифадаги шахсларнинг ҳуқуқларини таъминлаш масалалари бўйича ишлаб чиқилаётган норматив-ҳуқуқий ҳужжатлар лойиҳаларига таклифлар киритиш, ваколатли давлат органлари билан биргаликда спорт, маърифий ва маданий-оммавий тадбирларни ташкил этиш йўли билан иштирок этиши кўрсатиб ўтилган.
Ўзбекистон Республикаси Ногиронлар жамияти Амударё туман бўлинмаси ходимлари ҳам ногиронлиги бўлган шахсларнинг жамиятдда фаол иштирок этишига кўмаклашиш орқали улар учун ҳар томонлама қулай шароитлар яратишга ҳисса қўшиб келмоқда.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
