Фарзандига алимент тўламаган ота ҳуқуқбузарликда айбланди

Фарзанд тарбиясига ота ҳам, она ҳам бирдек масъул. Камолга етиб, ўз йўлини топиб олгунига қадар ҳар иккаласи тенг ғамхўрлик қилиши керак. Бироқ баъзи оилалардаги носоғлом муҳит, лоқайдлик ва ажрашишлар туфайли вояга етмаган болалар қаровсиз қолади. Ота ёки онанинг арзимаган сабаблар туфайли оилани барбод қилиши оқибатида ўртадаги болаларнинг маънавий ва моддий жиҳатдан қийналиб қолмасликлари учун уларнинг ҳуқуқлари давлат томонидан қонунчиликка мувофиқ ҳимоя қилинади.

Турмушидан ажрашган П.С.нинг (исмлар ўзгартирилган) ҳам бир нафар фарзанди бор. Фуқаролик ишлари бўйича туман суди томонидан шу фарзанди таъминоти учун унинг фойдасига собиқ турмуш ўртоғи Т.Т.дан иш ҳақи ва бошқа даромадларнинг тўртдан бир қисми миқдорида алимент ундириш белгиланди. Аммо Т.Т. бошқа оила қурганлиги ва 2 нафар фарзанди ҳам борлиги сабабли собиқ рафиқасидаги фарзандини моддий таъминлашга қийналди. Топган пули белгиланган миқдорга етмаса-да, олиб борган пайтида П.С. ундан тўлиқ қилиб олиб келишини талаб қилди ва қабул қилишдан бош тортди. Алимент нафақаси ўз муддатида тўланмаса маъмурий ва жиноий жавобгарликка тортилиши мумкинлиги ҳақида огоҳлантирилса ҳам  Т.Т. етарли пул беришга имкон топа олмади. Натижада отанинг зиммасидаги қарздорлик 4,5 млн. сўмдан ҳам ортиб кетди.

Бу орада фарзандининг таъминоти учун моддий ёрдамга муҳтож бўлиб, қийналиб қолган собиқ аёли П.С. судга мурожаат қилишга мажбур бўлди. Маъмурий ишлар бўйича туман суди томонидан ушбу иш кўриб чиқилганида ҳуқуқбузар Т.Т.нинг айби маъмурий иш ҳужжатларида мавжуд далиллар билан тўлиқ тасдиқланди ва у Ўзбекистон Pеспубликаси МЖтКнинг 47⁴-моддаси билан айбдор деб топилди.

Суд томонидан мазкур иш бўйича айбдорга қонун ҳужжатларида белгиланган жазо чораси қўлланди.

М.Каримбоева, Маъмурий ишлар бўйича туман суди раиси.