Чойкўлда чегара бўйича мажлис
Чойкўл овулида ижтимоий-маънавий муҳитни соғломлаштириш ҳамда чегара олди ҳудудида яшаш тартиб-қоидаларини аҳолига тарғиб қилиш мақсадида йиғилиш ўтказилди. 27 январь куни бўлиб ўтган йиғилишда Давлат хавфсизлик хизмати туман бўлинмаси ходимлари, туман ҳокимининг чегара масалалари бўйича ёрдамчиси, туман ҳокимлиги жамоат ва диний ташкилотлар билан алоқалар бўйича бош мутахасисси, туман Ички ишлар бўлимининг терроризм ва экстремизмга қарши курашиш гуруҳи вакили ҳамда туман бош имом-хатиби иштирок этди. Йиғилишга овул фуқаролар йиғини масъул ходимлари, маҳалла фаоллари, кўчабошчилари, ёшлар таклиф қилинди.
Йиғилишни “Чойкўл” овул фуқаролар йиғини раиси Яхшимурод Аҳмедов очди ва олиб борди. У ўз сўзида сўнгги йилларда Президентимиз томонидан аҳоли фаровонлигини ошириш бўйича ғамхўрликлар кучаяётгани, ёшлар таълим-тарбиясига жиддий эътибор қаратиш бугунги кундаги долзарб вазифага айланганини, бунинг замирида Ватанимизнинг порлоқ келажагини яратишдек эзгу мақсад ётганини таъкидлади. Шунингдек, ёшлар қалбида ватанпарварлик туйғуларини, миллий, маънавий-маданий қадриятларни мустаҳкамлаш, “Жаҳолатга қарши – маърифат” ғояси асосида жамиятда ижтимоий-маънавий муҳит барқарорлигини таъминлаш, инсонпарварлик, эзгулик ва тинчликни қадрлаш ҳамда диний бағрикенглик ва миллатлараро тотувликни янада мустаҳкамлаш асосий вазифалардан бири эканлиги таъкидланди.
Туман ҳокимининг чегара масалалари бўйича ёрдамчиси Ойбек Шомуродов сўзга чиқиб, шахсларнинг чегара олди зонасига кириши, ундан чиқиши, ўтиши, у ерда бўлиши яшаши, агар қонун ҳужжатларида бошқача тартиб белгиланган бўлмаса, ички ишлар органларининг рухсатномаси асосида амалга оширилиши, чегара олди минтақасига кириш ва ундан чиқиш, ўтиш, у ерда вақтинча бўлиш, яшаш, ҳаракатланиш чегара қўшинларининг рухсатномаси асосида амалга оширилиши тўғрисида батафсил тушунтириш берди. Аҳолини “Ўзбекистон Республикасининг Давлат чегараси тўғрисида”ги Қонунда кўрсатилган тартиб-қоидаларга риоя этишга чақирди.
Шундан сўнг, туман ҳокимлигининг жамоат ва диний ташкилотлар билан алоқалар бўйича бош мутахассиси Жаҳонгир Йўлдошев сўзга чиқиб, бугунги кунда муҳтарам Президентимиз томонидан ёшлар таълим-тарбиясига алоҳида эътибор қаратилаётганлигини айтиб ўтди. Аҳоли, айниқса, ёшларнинг мутаассиб ғояларга берилиш ҳолатларининг олдини олиш мақсадида ёшларнинг бўш вақтларини мазмунли ўтказишларига шароит яратиш, ҳудуддаги маданият марказида туманимизнинг иқтидорли санъаткорлари ижросида турли томошалар ташкил этиб бориш, уларни китобхонликка ва спорт билан мунтазам шуғулланишга жалб этиш лозимлиги таъкидлади.
Ўқувчи-ёшлар ва кенг жамоатчилик ўртасида ижтимоий тармоқларда тарқатилаётган турли ғаразли ёт ғояларга қарши мафкуравий иммунитетни шакллантириш, ёшлар қалбида ватанпарварлик туйғуларини кучайтириш, миллий, маънавий-маданий қадриятларни мустаҳкамлаш, “Жаҳолатга қарши – маърифат” ғояси асосида жамиятда ижтимоий-маънавий муҳит барқарорлигини таъминлашга барча бирдек масъул эканлигини алоҳида таъкидланди.
Йиғилишда туман бош имом-хатиби Абдураҳмон Матсапаев сўзга чиқиб, мутаассиблик, экстремизм ва терроризмга қарши маънавий-тарғибот фаолиятини янада кучайтириш, маънавий-маърифий тадбирларда ижтимоий-иқтисодий ҳамда дин соҳасидаги олиб борилаётган ислоҳотлар мазмун-моҳиятини аҳолига етказиш кераклигини таъкидлади. Шу қаторда сўнгги йилларда мамлакатимизда диний соҳа фаолиятини такомиллаштириш бўйича амалга оширилаётган ишлар тўғрисида ҳам тўхталиб ўтди.
Чойкўл овул фуқаролар йиғини профилактика инспектори Икром Султонов ҳудудда жиноятчилик ва ҳуқуқбузарликларнинг олдини олиш борасидаги амалга оширилаётган ишлар ҳақида батафсил маълумот берди.
Йиғилиш давомида аҳоли томонидан билдирилган фикр-мулоҳазалар тингланиб, уларни қизиқтирган саволларга жавоблар берилди ва муҳокама этилган масалалар бўйича тегишли қарорлар қабул қилинди
О.Ражабова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
