ПРОБАЦИЯ ҲИСОБИДАГИ МАҲКУМНИНГ ЖАЗОСИ СУД ҲУКМИГА КЎРА ЯНАДА ОҒИРЛАШТИРИЛДИ

Сайёр судларда Пробация назорати остида турган маҳкумларга доир ишлар кўрилиб, муносиб деб топилганлари шартли равишда озод этилмоқда. Суд-ҳуқуқ тизимидаги ислоҳотларнинг самараси бўлган ушбу шартли озодлик туфайли бугун кўплаб маҳкумлар кечирилмоқда.

16 июнь куни Жиноят ишлари бўйича туман судида очиқ сайёр суд мажлиси ўтказилди. Унда Жиноят ишлари бўйича туман суди раиси С.Давлетмуродов, туман прокурори ёрдамчиси С.Ёрмуҳаммедов ҳамда туман ички ишлар органлари Пробация гуруҳи катта инспектори майор И.Жаббарбергановлар қатнашишди.

Суд мажлисида тумани ички ишлар органлари Пробация гуруҳи томонидан келтирилган тақдимномалар асосида 3 нафар маҳкумга доир иш кўриб чиқилди. Улардан бири Ўзбекистон Республикаси ЖКнинг 105-моддаси 2-қисми “в” банди билан 3 йил муддатга озодликни чеклаш, иккинчиси Ўзбекистон Республикаси ЖКнинг 169-моддаси 2-қисми “б”, “г” бандлари билан 2 йил муддатга 10 фоиз ахлоқ тузатиш ишлари жазосига судланган бўлиб, ўз жазо муддатини ўташ даврида ўрнатилган тартиб-қоидаларга амал қилиб келишди. Шу сабабли Пробация гуруҳи томонидан муносиб хулқ-атворда ва меҳнатга ҳалол муносабатда бўлган ушбу маҳкумлар иши бўйича судга тақдимномалар берилди. Суд мажлисида тақдимномага асосан 2 нафар маҳкум ўталмаган жазо муддатидан Ўзбекистон Республикаси Жиноят кодексининг 73-моддасига асосан муддатидан илгари шартли равишда озод қилинди.

Аммо улар орасида жазо ўташдан бўйин товлайдиганлар ҳам учрайди. ЎзР ЖКнинг 169-моддаси 3-қисми “а” банди билан ЖКнинг 74-моддасига асосан 2 йил 2 ой муддатга 20 фоиз ахлоқ тузатиш ишлари жазосига ҳукм қилинган пробация назоратида турган яна бир фуқаро  ахлоқ тузатиш ишлари жазосини ўташдан бўйин товлаб келди.  Шу сабабли суд мажлисида ушбу фуқаронинг ўталмаган 1 йил 9 ой 22 кун жазо муддати ЖКнинг 46-моддаси 4-қисмига асосан озодликни чеклаш жазосига алмаштирилди.

И.Жабборберганов,
туман ИИО Пробация гуруҳи
катта инспектори, майор.