КАРАНТИН ҚОИДАЛАРИГА АМАЛ ҚИЛИНИШ ҲОЛАТИ НАЗОРАТ ҚИЛИНМОҚДА

Бугунги кунда бутун дунё аҳолиси коронавирус пандемияси билан курашмоқда. Ҳамманинг эътибори касалликдан сақланиш ва уйда қолиб, уни жиловлашга ҳисса қўшишга қаратилган. Хўш, шу мақсадда жорий этилган карантин қоидаларига юртдошларимиз қай тарзда амал қилмоқда?

Афсуски дунё мамлакатлари қатори Ўзбекистонда ҳам кейинги кунларда коронавирус инфекциясига чалинганлар тобора  кўпайиб бормоқда ва қурбонлар сони ҳам ошмоқда. Мавжуд ҳолатни эътиборга олиб, Республика махсус комиссияси 13 июлдан 1 августгача бутун малакатимизда карантин чораларини кучайтирди, кўпгина фаолият турлари, умумий овқатланиш шоҳобчалари, хизмат кўрсатувчи ташкилотлар, буюм бозорлари, жамоат транспорти фаолияти тўхтатилди. Шунингдек, фуқароларнинг шахсий транспорт воситаларидан фойдаланишларига ҳам чеклов ўрнатилди яъни эрталаб 7 дан 10 гача, кечқурун 17 дан 20 гача ишга бориш-келиш зарурати ҳисобга олинган ҳолда рухсат этилди.

Фуқароларга эса жамоат жойларига иложи борича бормаслик, зарурият  юзасидан кўчага чиққанда тиббий ниқоб тақиб, қўлқоп кийиш, санитария-гигиена қоидаларига қатъий амал қилиш тавсия этилиб, бу тартибга бўйсунмаганлар ўрнатилган тартибда маъмурий жавобгарликка тортилиши белгиланди.

Афсуски, туманимиз ҳудудини кезсангиз – бу қоидаларга баъзи юртдошларимиз тўла амал қилмаётганлигига гувоҳ бўласиз. Шуни унутмаслик керакки, коронавирус инфекциясидан ҳеч ким бутунлай ҳимояланган эмас, ҳеч ким бу касаллик менга дахл қилмайди, ундан сақланиш борасидаги талабларнинг менга  алоқаси йўқ, дея олмайди. Кўзга кўринмас душман тобора кўпроқ ҳудудларни қамраб олаётгани ҳаммамизга аён.

Бу борада туман Санитария-эпидемиологик осойишталик маркази, туман Тиббиёт бирлашмаси шифокорлари тинимсиз тарғибот олиб боришаяпти, Миллий гвардия, Ички ишлар бўлими ходимлари назорат  тадбирларини ўтказишаяпти. Бироқ  карантин талабларини менсимаётганлар ҳамон учраб турибди.

Шу йилнинг 14 июль куни кундузи ва кечки вақтларда туман Ички ишлар бўлими Йўл патруль хизмати ва Миллий гвардия ходимлари ҳамкорликда туманимиз ҳудудидаги марказий кўчаларда карантин чекловларига амал қилиниши юзасидан назорат рейдини олиб бордилар.

Маълумки, 2020 йилдан 1 августгача ўрнатилган карантин чекловларига кўра, махсус рухсатномалар яъни стикерлар асосида ҳаракатланадиган автотранспорт воситалари ҳамда Республика махсус комиссиясининг жорий йил 8 июлдаги  қарори билан тасдиқланган Автотраснспорт воситалари ҳаракатланишига махсус рухсатнома талаб этилмайдиган  ҳолатлардан ташқари, барча автотранспортлар сутканинг маълум вақтидагина  ҳаракатланиши лозим. Бироқ назорат тадбири давомида барча ҳам  бу талабга бўйсунмаётгани аён бўлди.

Хусусан, рейд давомида йўлларда ҳаракатланаётган автотранспорт воситалари тўхтатилиб, ҳужжатлари текширилганида автомашинани ҳужжатсиз бошқариш, карантин қоидалари бузиб, рухсат этилмаган вақтда автотранспорт воситаларини бошқариш ҳолатлари кўплаб қайд этилди.

Мазкур фуқароларга нисбатан маъмурий баённомалар расмийлаштирилди ва профилактик тушунтириш ишлари олиб борилди. Шунингдек, сутканинг белгиланмаган вақтида шахсий автомобилини бошқариб бораётган бир неча шахслар огоҳлантирилди ва бу борадаги қоидалар тушунтирилди. Шуни эсдан чиқармаслик лозимки, ҳар қандай назорат тадбири барча йўлларни қамраб ололмайди. Бироқ фуқароларимиз бир нарсани эсдан тутиши лозимки, карантин қоидаларига амал қилиш – ҳар кимнинг ўзи учун, ўз оила аъзолари, яқинлари коронавирусга чалинишининг олдини олиши учун зарур.

Шунинг учун барчамиз бу қоидаларга бирдек бўйсуниб, аёвсиз душман – коронавирусни биргаликда енгишга интилмоғимиз лозим.

О.РАЖАБОВА.